කැනේඩියානු අග්රාමාත්ය මාර්ක් කාර්නි මහතා ප්රකාශ කළේ මැදපෙරදිග කලාපයේ උත්සන්න වෙමින් පවතින යුදමය වාතාවරණය හමුවේ තම රටේ හමුදා දායකත්වය ලබාදීමේ හැකියාව සහමුලින්ම බැහැර කළ නොහැකි බවයි. මේ දිනවල ඕස්ට්රේලියාවේ නිල සංචාරයක නිරත වන අග්රාමාත්යවරයා, කැන්බරා නුවරදී එරට අගමැති ඇන්තනි ඇල්බනීස් සමඟ පැවැත්වූ මාධ්ය හමුවකදී මේ බව සඳහන් කළේය. අමෙරිකානු සහ ඊශ්රායල ප්රහාර හමුවේ ඉරානයේ උත්තරීතර නායක අයතුල්ලා අලි කමේනි ඝාතනය වීමත් සමඟ ආරම්භ වූ මෙම මහා පරිමාණ යුද්ධය හමුවේ කැනඩාව සිය මිත්ර රටවල් සමඟ අත්වැල් බැඳගන්නා බව ඔහු මෙහිදී අවධාරණය කළේය.
අමෙරිකානු සහ ඊශ්රායල ප්රහාර ජාත්යන්තර නීතියට පටහැනි බව මීට පෙර ප්රකාශ කර තිබුණද, ඉරානය න්යෂ්ටික අවියක් නිෂ්පාදනය කිරීම වැළැක්වීමට ගන්නා උත්සාහයන්ට කැනඩාව සහාය දක්වන බව අගමැති කාර්නි මහතා පැවසීය. කෙසේ වෙතත්, මෙය ජාත්යන්තර පර්යායේ බිඳවැටීමක් ලෙස තමන් කණගාටුවෙන් යුතුව පිළිගන්නා බව ද ඔහු සඳහන් කළේය. පවතින ගැටුම්කාරී තත්ත්වය සමනය කිරීම (De-escalation) අත්යවශ්ය බව අවධාරණය කළ හෙතෙම, ඕස්ට්රේලියාව වැනි “මධ්යම බලවතුන්” (Middle Powers) එක්ව නව ලෝක පර්යායක් ගොඩනැගීමට කටයුතු කළ යුතු බවට ද ඉල්ලීමක් කළේය.
අගමැති කාර්නිගේ මෙම සංචාරය ආසියා-පැසිෆික් කලාපය තුළ අමෙරිකාව මත පවතින යැපීම අවම කිරීමේ අරමුණින් සංවිධානය කර ඇති අතර, ඩොනල්ඩ් ට්රම්ප් පාලනය විසින් කැනඩාවට එල්ල කරන තර්ජන හමුවේ මෙය තීරණාත්මක පියවරක් ලෙස සැලකේ. ඕස්ට්රේලියානු පාර්ලිමේන්තුව අමතමින් ඔහු කියා සිටියේ, බලවත් රටවල් ලෝක නීති සැකසීමට පෙර මධ්යම ප්රමාණයේ බලයක් සහිත රටවල් ඒකරාශී වී තම අයිතිවාසිකම් සහ අනාගතය වෙනුවෙන් පෙනී සිටිය යුතු බවයි. ආරක්ෂක ක්ෂේත්රයේ සහ කෘතිම බුද්ධිය (AI) වැනි නවීන තාක්ෂණික අංශවල සහයෝගීතාවය වර්ධනය කර ගැනීමට ද මෙහිදී එකඟතාවය පළ විය.
ඉරාන නෞකාවකට ශ්රී ලංකාවට දකුණු දෙසින් ප්රහාරයක් එල්ල වීම සහ කලාපයේ නාවික ගමනාගමනයට එල්ල වී ඇති තර්ජන හමුවේ, කැනඩාව වැනි රටවල් යුද්ධයට මැදිහත් වීමේ හැකියාව පිළිබඳව කළ මෙම ප්රකාශය ජාත්යන්තර අවධානයට ලක්ව තිබේ. විශේෂයෙන්ම අමෙරිකානු ජනාධිපති ඩොනල්ඩ් ට්රම්ප් කැනඩාව සිය රටට ඈඳා ගන්නා බවට කරන තර්ජන සහ පනවා ඇති බදු පීඩනය හමුවේ, අගමැති කාර්නිගේ මෙම ස්වාධීන විදේශ ප්රතිපත්තිය අතිශය වැදගත් වේ.
