කැනඩාවේ ටම්බ්ලර් රිජ් (Tumbler Ridge) ප්රදේශයේ පාසලක සිදුවූ දරුණු වෙඩි තැබීමකින් බරපතල තුවාල ලැබූ 12 හැවිරිදි මායා ගෙබාලා (Maya Gebala) නමැති දැරියගේ පවුලේ සාමාජිකයන් විසින් ChatGPT නිර්මාණය කළ OpenAI සමාගමට එරෙහිව සිවිල් නඩුවක් ගොනු කර තිබේ. සැකකාර වෙඩික්කරු මෙම ප්රහාරය සැලසුම් කරන බවට ChatGPT පද්ධතිය හරහා තොරතුරු අනාවරණය වී තිබියදීත්, ඒ පිළිබඳව බලධාරීන් දැනුවත් කිරීමට සමාගම අපොහොසත් වූ බවට ඔවුන් චෝදනා කරයි. පසුගිය පෙබරවාරි 10 වැනිදා සිදුවූ මෙම ප්රහාරයෙන් කුඩා දරුවන් පස් දෙනෙකු ඇතුළු පුද්ගලයන් අට දෙනෙකු ජීවිතක්ෂයට පත් වූ අතර මායා දැරියගේ හිසට සහ බෙල්ලට වෙඩි වැදී ඇය මේ වන විටත් රෝහල්ගතව ප්රතිකාර ලබයි.
නඩු වාර්තාවලට අනුව, 18 හැවිරිදි සැකකරු වන ජෙසී වැන් රූට්සෙලාර් (Jesse Van Rootselaar) 2025 වසරේදී ChatGPT සමඟ පවත්වා ඇති සංවාදවලදී තුවක්කු ප්රචණ්ඩත්වය සම්බන්ධ විවිධ අවස්ථා විස්තර කර තිබේ. OpenAI ආයතනයේ සේවකයන් 12 දෙනෙකු විසින්ම මෙම සංවාද අනතුරුදායක බවට හඳුනාගෙන කැනේඩියානු පොලිසිය දැනුවත් කරන ලෙස නිර්දේශ කර තිබුණද, සමාගම් පාලනාධිකාරිය එම ඉල්ලීම ප්රතික්ෂේප කර ඇත්තේ එම අවස්ථාවේදී එය “සෘජු තර්ජනයක්” ලෙස නොපෙනුණු බව පවසමිනි. එවකට ගත් එකම ක්රියාමාර්ගය වූයේ සැකකරුගේ ගිණුම තහනම් කිරීම පමණක් වන අතර, ඔහුට පසුව වෙනත් ගිණුමක් හරහා සිය සැලසුම් ඉදිරියට ගෙන යාමට හැකි වී තිබේ.
මෙම සිදුවීම සම්බන්ධයෙන් OpenAI සමාගම සිය කනගාටුව පළ කර ඇති අතර, ඉදිරියේදී මෙවැනි ඛේදවාචක වළක්වා ගැනීම සඳහා පොලිසිය සමඟ සෘජු සම්බන්ධතා පවත්වා ගැනීමටත්, අනතුරුදායක සංවාද හඳුනාගැනීමේ නිර්ණායක ලිහිල් කිරීමටත් එකඟ වී ඇත. OpenAI ප්රධාන විධායක නිලධාරී සෑම් ඇල්ට්මන් ද පසුගියදා කැනේඩියානු බලධාරීන් හමු වී ආරක්ෂක ප්රොටෝකෝල ශක්තිමත් කරන බවට පොරොන්දු වී තිබේ. කෙසේ වෙතත්, මෙම වෙනස්කම් ප්රායෝගිකව ක්රියාත්මක වන ආකාරය පිළිබඳව කැනේඩියානු රජය තවමත් විමසිල්ලෙන් පසුවන බව එරට කෘතිම බුද්ධිය පිළිබඳ අමාත්යවරයා සඳහන් කර ඇත.
