ප්රමුඛතම ග්රැෆික් නිර්මාණ වේදිකාවක් වන Canva, සිය කෘතිම බුද්ධි (AI) සහ අලෙවිකරණ ස්වයංක්රීයකරණ හැකියාවන් ඉහළ නැංවීම සඳහා Simtheory සහ Ortto යන සමාගම් දෙකම අත්පත් කරගත් බව වාර්තා වේ. Simtheory යනු ව්යාපාරික කටයුතු සඳහා AI සහායකයින් සහ වැඩ ප්රවාහයන් (Workflows) සකස් කිරීමට උදවු වන වේදිකාවක් වන අතර, Ortto යනු පාරිභෝගික දත්ත සහ අලෙවිකරණ කටයුතු ස්වයංක්රීයව මෙහෙයවීමට පහසුකම් සපයන සමාගමකි. මෙම සමාගම් දෙකෙහිම නිර්මාතෘවරුන් වන ක්රිස් ෂාකී සහ මයික් ෂාකී ඉදිරියේදී Canva හි AI සහ අලෙවිකරණ තාක්ෂණික කණ්ඩායම් මෙහෙයවනු ඇත.
Canva හි සම-නිර්මාතෘ ක්ලිෆ් ඕබ්රෙක්ට් පවසන්නේ මෙම අත්පත් කරගැනීම් හරහා Canva සරල නිර්මාණ මෙවලමක සිට සම්පූර්ණ AI වේදිකාවක් දක්වා පරිවර්තනය වීම වේගවත් වන බවයි. විශේෂයෙන්ම Ortto හි තාක්ෂණය Canva Grow සමඟ ඒකාබද්ධ කිරීමෙන් නිර්මාණකරණයේ සිට එය පාරිභෝගිකයා වෙත බෙදා හැරීම දක්වා වූ සම්පූර්ණ අලෙවිකරණ ක්රියාවලියම එකම ස්ථානයකදී සිදු කිරීමට පරිශීලකයන්ට අවස්ථාව හිමි වේ. 2025 වසරේ ජනවාරි මාසයේ සිට Canva විසින් Doohly, Cavalry, සහ MagicBrief වැනි සමාගම් රැසක් සිය ව්යාපාරයට එක්කර ගනිමින් සිටියි.
වර්තමානය වන විට Canva සතුව මාසිකව සක්රීය පරිශීලකයන් මිලියන 265ක් පමණ සිටින අතර ඉන් මිලියන 31ක් ගෙවීම් කර සේවාවන් ලබාගන්නා පාරිභෝගිකයන් වේ. 2025 වසරේදී සමාගමේ වාර්ෂික ආදායම ඩොලර් බිලියන 4ක් දක්වා වර්ධනය වී ඇති අතර, මෙම නව AI ඒකාබද්ධ කිරීම් හරහා සිය ව්යාපාරික වර්ධනය තවදුරටත් ඉදිරියට ගෙන යාමට ඔවුන් බලාපොරොත්තු වේ.
