ලංකා වාණිජ මණ්ඩලය (CCC) විසින් සංවිධානය කරන ලද “සුළු හා මධ්ය පරිමාණ ව්යවසායකයින් සඳහා මූල්ය ප්රවේශය: රජයේ සහනදායී ණය පහසුකම් අවබෝධ කර ගැනීම” මැයෙන් වූ සම්මන්ත්රණය සහ පැනල සාකච්ඡාව පසුගිය පෙබරවාරි මාසයේදී සාර්ථකව පවත්වා තිබේ. ව්යවසායකයින් 130කට අධික පිරිසකගේ සහභාගීත්වයෙන් පැවැති මෙම වැඩසටහන මගින් සහනදායී ණය පහසුකම් ලබා ගැනීමට සහ විධිමත් මූල්ය යාන්ත්රණ හරහා ව්යාපාරික ඔරොත්තු දීමේ හැකියාව ශක්තිමත් කර ගැනීමට සුළු හා මධ්ය පරිමාණ අංශය දක්වන දැඩි උනන්දුව මනාව පිළිබිඹු විය.
මෙහි ප්රධාන දේශනය පවත්වමින් කර්මාන්ත හා ව්යවසායකත්ව සංවර්ධන නියෝජ්ය අමාත්ය චතුරංග අබේසිංහ මහතා ප්රකාශ කළේ, සහනදායී ණය යෝජනා ක්රම මගින් ව්යවසායකයින් දිරිමත් කිරීමට රජය කැපවී සිටින බවයි. දැරිය හැකි මූල්ය ප්රවේශයක් ලබා දීම මෙන්ම ඩිජිටල් ක්රමවේද ඔස්සේ ණය ලබා ගැනීමේ ක්රියාවලිය සරල කිරීම රට පුරා සිටින ව්යවසායකයින් බලගැන්වීම සඳහා අත්යවශ්ය බව ඔහු මෙහිදී අවධාරණය කළේය. රජයේ සහ මූල්ය අංශයේ ජ්යෙෂ්ඨ නිලධාරීන්ගේ සහභාගීත්වයෙන් පැවැති පැනල සාකච්ඡාවේදී ණය සඳහා සුදුසුකම් ලැබීම, අයදුම් කිරීමේ පටිපාටිය සහ ඒ ආශ්රිත අභියෝග පිළිබඳව සහභාගී වූවන් දැනුවත් කෙරිණි.
මෙම වැඩසටහනට සමගාමීව පැවැති විශේෂ “ව්යාපාරික සායනය” (Business Clinic) හරහා DFCC බැංකුව, යූනියන් බැංකුව, ජාතික ව්යවසායකත්ව සංවර්ධන අධිකාරිය (NEDA), අපනයන සංවර්ධන මණ්ඩලය (EDB) සහ DHL වැනි ආයතන සමඟ පෞද්ගලිකව සාකච්ඡා කර තමන්ට ගැලපෙන මූල්ය හා උපදේශන සේවා ලබා ගැනීමට ව්යවසායකයින්ට අවස්ථාව හිමි විය.
