ලංකා විදුලිබල මණ්ඩලය 2025 වර්ෂයේ පළමු මාස හය තුළ රුපියල් බිලියන 13.16ක ශුද්ධ අලාභයක් වාර්තා කර ඇති බව බලශක්ති අමාත්යාංශය නිකුත් කළ ප්රගති වාර්තාවක සඳහන් වන අතර මෙම මූල්ය පසුබෑමට ප්රධානතම හේතුව ලෙස පෙන්වා දී ඇත්තේ 2024 වසරේ ජූලි මාසයේ සහ 2025 ජනවාරි මාසයේදී ක්රියාත්මක කරන ලද විදුලි ගාස්තු අඩු කිරීම හේතුවෙන් මණ්ඩලයේ ආදායම පහත වැටීමයි. කෙසේ වෙතත් මෙවැනි දැවැන්ත අලාභයක් ලබන පසුබිමක වුවද මණ්ඩලය විසින් සිය සේවකයන් සඳහා අමාත්ය මණ්ඩල අනුමැතියකින් තොරව රුපියල් මිලියන 1,060.02ක මුදලක් දීමනා වශයෙන් ගෙවා ඇති බව ජාතික විගණන කාර්යාලය මගින් අනාවරණය කර තිබේ. විශේෂයෙන්ම වැටුප් හා සේවක කොමිෂන් සභාවේ නිර්දේශ හෝ කළමනාකරණ සේවා දෙපාර්තමේන්තුවේ අනුමැතියකින් තොරව මෙම ගෙවීම් සිදු කර ඇති බව විගණන වාර්තාවල වැඩිදුරටත් සඳහන් වේ.
මීට අමතරව අමාත්ය මණ්ඩල තීරණයකට අනුව වෘත්තීය දීමනාව හිමි නිලධාරීන්ට රඳවා ගැනීමේ දීමනාව නොගෙවිය යුතු වුවත් එම තීරණය උල්ලංඝනය කරමින් නිලධාරීන් 601 දෙනෙකු සඳහා 2024 වර්ෂය තුළ රුපියල් මිලියන 191.3ක මුදලක් රඳවා ගැනීමේ දීමනා ලෙස ගෙවා ඇති බව හෙළි වී තිබේ. ලංකා විදුලිබල මණ්ඩලයේ ආදායම පහත වැටී ඇති මොහොතක විධිමත් අනුමැතියකින් තොරව මෙලෙස මිලියන ගණනින් දීමනා ගෙවීම මණ්ඩලයේ මූල්ය පාලනයේ පවතින බරපතල දුර්වලතාවක් ලෙස විගණන අංශ පෙන්වා දෙයි. මෙම තත්ත්වය මගින් ආයතනික පාඩුව තවදුරටත් වර්ධනය වී ඇති අතර මහජනතාවගෙන් අය කරගන්නා මුදල් මෙලෙස අවිධිමත් ලෙස පරිහරණය කිරීම පිළිබඳව ද දැඩි කතාබහක් නිර්මාණය වී ඇත.
