සූක්ෂ්ම ලෙස ජනතා මුදල් ගසාකන තහනම් පිරමීඩ ගනුදෙනු සිදුකරන ආයතන 24ක් මේ වන විට හඳුනාගෙන ඇති බව ශ්රී ලංකා මහ බැංකුව නිවේදනය කරයි. මීට පෙර ආයතන 23ක් හඳුනාගෙන තිබූ අතර, පසුගිය 25 වන දින තවත් එක් ආයතනයක් එම ලැයිස්තුවට අලුතින් එක් කළ බව මහ බැංකුවේ මූල්ය පාරිභෝගික සබඳතා දෙපාර්තමේන්තුව සඳහන් කළේය.
මෙලෙස අලුතින්ම හඳුනාගෙන ඇත්තේ I.C.A.N Advertising (Pvt) Ltd ආයතනය සහ ඊට අනුබද්ධිත icanonlineadvertising.com, bannercuts.com, bannercuts.lk, bannercuts.net සහ bannercuts.org යන වෙබ් අඩවි පද්ධතියයි. 1988 අංක 30 දරන බැංකු පනතේ 83ඇ වගන්තිය ප්රකාරව සිදුකළ විමර්ශනවලින් පසු මෙම ආයතන තහනම් පිරමීඩ යෝජනා ක්රම පවත්වාගෙන යන බවට තහවුරු වී තිබේ.
මහ බැංකුව විසින් ප්රසිද්ධ කරන ලද සම්පූර්ණ තහනම් ලැයිස්තුවට පහත ආයතන සහ Apps ඇතුළත් වේ:
– Tiens Lanka Health Care (Pvt) Ltd
– Best Life International (Pvt) Ltd
– Global Lifestyle Lanka (Pvt) Ltd
– OnmaxDT
– MTFE App
– Qnet / Questnet
– Sport Chain App
– Fastwin (Pvt) Ltd
– Fruugo Online App
– Ledger Block
– SGO (sgomine.com)
– I.C.A.N Advertising (Pvt) Ltd
මෙවැනි තහනම් ජාලයන්හි මුදල් ආයෝජනය කිරීම, ඒවා ප්රවර්ධනය කිරීම හෝ මෙහෙයවීම දඬුවම් ලැබිය හැකි බරපතළ නීතිවිරෝධී කටයුත්තක් බව මහ බැංකුව අවධාරණය කරයි. මෙවැනි වංචනිකයින්ට හසු නොවී තම දේපළ ආරක්ෂා කර ගන්නා ලෙස මහ බැංකුව මහජනතාවගෙන් වැඩිදුරටත් ඉල්ලා සිටියි.
