යුක්රේන සහ බටහිර ආසියානු කලාපීය යුද ගැටුම් සඳහා අවශ්ය අඩු පිරිවැය ඩ්රෝන යානා සහ ඒවායේ උපාංග මිලදී ගැනීමට රුසියාවට සහ ඉරානයට සම්බන්ධ කණ්ඩායම් වැඩි වශයෙන් ක්රිප්ටෝ මුදල් භාවිතා කරන බව ‘Chainalysis’ ආයතනය නිකුත් කළ නවතම වාර්තාවක දැක්වේ. සාමාන්ය බැංකු පද්ධතිය හරහා සිදුවන ගනුදෙනු වෙනුවට, බ්ලොක්චේන් (Blockchain) තාක්ෂණය ඔස්සේ ක්රියාත්මක වන මෙම ඩිජිටල් මුදල් භාවිතය හරහා ජාත්යන්තර සම්බාධක මගහැරීමට ඔවුන් උත්සාහ කරන බව එමඟින් පෙන්වා දෙයි. 2022 වසරේ රුසියාව යුක්රේනය ආක්රමණය කළ දා සිට, රුසියානු හිතවාදී කණ්ඩායම් විසින් ක්රිප්ටෝ මුදල් ආධාර ලෙස ඇමෙරිකානු ඩොලර් මිලියන 8.3කට වඩා රැස්කර ඇති අතර, එම මුදල් ප්රධාන වශයෙන්ම ඩ්රෝන යානා මිලදී ගැනීම සඳහා වැය කර තිබේ.
සාමාන්ය වෙළඳ වෙබ් අඩවි හරහා මෙම ඩ්රෝන යානා සහ උපාංග මිලදී ගන්නා බැවින් ඒවායේ සැබෑ අරමුණ හඳුනා ගැනීම බලධාරීන්ට අපහසු වී ඇති නමුත්, බ්ලොක්චේන් දත්ත විශ්ලේෂණය කිරීමෙන් මෙම මුදල් පසුම්බි (Wallets) මිලිටරි කණ්ඩායම් වෙත සම්බන්ධ වන ආකාරය හඳුනා ගැනීමට විමර්ශකයින්ට හැකි වී තිබේ. වාණිජමය වශයෙන් ඕනෑම අයෙකුට මිලදී ගත හැකි මෙවැනි ඩ්රෝන යානා යුද පිටියේදී ප්රබල මෙවලමක් බවට පත්ව ඇති අතර, ඒවා ක්රිප්ටෝ මුදල් හරහා සූක්ෂ්ම ලෙස ලබා ගැනීම ගෝලීය ආරක්ෂාවට දැඩි තර්ජනයක් බව Chainalysis ආයතනයේ ජාතික ආරක්ෂක අංශ ප්රධානී ඇන්ඩෘ ෆියර්මන් මහතා පවසයි. කෙසේ වෙතත්, බ්ලොක්චේන් තාක්ෂණයේ පවතින විනිවිදභාවය හේතුවෙන් මෙම ගනුදෙනු ආරම්භ වූ ස්ථානයේ සිට අවසාන ගමනාන්තය දක්වා නිරීක්ෂණය කිරීමටත්, ඒ හරහා මෙවැනි නීතිවිරෝධී මිලදී ගැනීම් පාලනය කිරීමට අවශ්ය දත්ත රැස් කිරීමටත් විමර්ශකයින් මේ වන විට කටයුතු කරමින් සිටී.
