ශ්රී ලංකා කාන්තා ක්රිකට් කණ්ඩායමේ නායිකා චමරි අතපත්තු, ලෝක ක්රිකට් ක්රීඩකයන්ගේ සංගමයේ (WCA) ක්රීඩක උපදේශක මණ්ඩලය සඳහා පත් කර ඇති බව නිවේදනය කර තිබේ. මෙය ශ්රී ලංකා ක්රිකට් ඉතිහාසයේ සුවිශේෂී සන්ධිස්ථානයක් ලෙස සැලකෙන අතර, ඇය මෙම මණ්ඩලයට එක්වන්නේ පැට් කමින්ස්, ජේසන් හෝල්ඩර්, හීදර් නයිට් සහ ඒඩන් මාක්රම් වැනි ලොව ප්රමුඛ පෙළේ ජාත්යන්තර ක්රිකට් තරු සමඟිනි. රෂීඩ් ඛාන් සහ ඩැරිල් මිචෙල් වැනි ක්රීඩකයන් ද චමරි සමඟ අලුතින් මෙම මණ්ඩලයට එක්වී ඇති අතර, විශ්රාම යන සාමාජිකයන් වන ටිම් සවුති සහ සෝෆී ඩිවයින් වෙනුවට මෙම පත්වීම් සිදු කර ඇත.
සිය පත්වීම පිළිබඳව අදහස් දක්වමින් චමරි අතපත්තු ප්රකාශ කළේ, මෙම ගෝලීය උපදේශක මණ්ඩලයට තේරී පත්වීම තමාට මෙන්ම සමස්ත ශ්රී ලංකාවට සහ ආසියානු ක්රිකට් ප්රජාවටම ඉමහත් ගෞරවයක් බවයි. ජාත්යන්තර ක්රිකට් ක්රීඩිකාවක ලෙස තමන් ලබා ඇති අත්දැකීම් උපයෝගී කරගනිමින් ලොව පුරා සිටින ක්රීඩක ක්රීඩිකාවන්ගේ හඬ ශක්තිමත් කිරීමටත්, විශේෂයෙන් ක්රිකට් ක්රීඩාවේ අනාගතය තීරණය කිරීමේදී ආසියානු කලාපයේ නියෝජනය සහතික කිරීමටත් තමන් කැපවන බව ඇය වැඩිදුරටත් සඳහන් කළාය. ක්රිකට් ක්රීඩාවේ වර්ධනය, ක්රීඩක සුබසාධනය සහ ගෝලීය ක්රිකට් පද්ධතියට ධනාත්මක දායකත්වයක් ලබා දීම සිය මූලික අරමුණ බව ද ඇය අවධාරණය කළාය.
