වහාම ක්රියාත්මක වන පරිදි දැඩි පියවර නොගතහොත් 2040 වසර වන විට ලොව පුරා වයස අවුරුදු 5ත් 19ත් අතර දරුවන් මිලියන 220කට අධික සංඛ්යාවක් ස්ථුලතාවයෙන් (Obesity) පීඩා විඳිනු ඇතැයි ලෝක ස්ථුලතා සම්මේලනය (World Obesity Federation) අනතුරු අඟවයි. ඔවුන්ගේ නවතම වාර්තාවට අනුව, 2025 වසරේදී මිලියන 180ක් වූ මෙම අගය 2040 වන විට මිලියන 227 දක්වා ඉහළ යනු ඇති අතර, අධික බර සහිත (Overweight) දරුවන් සංඛ්යාව බිලියන භාගය ඉක්මවා යනු ඇත. මෙහි ඇති බියකරුම තත්ත්වය වන්නේ, පාසල් යන වයසේ පසුවන දරුවන් මිලියන 120කට පමණ අධික ශරීර ස්කන්ධ දර්ශකය (BMI) හේතුවෙන් ඇතිවන බෝ නොවන නිදන්ගත රෝගවල මුල් ලක්ෂණ පහළ වීමයි.
ගෝලීය වශයෙන් ගත් කල, අධික ශරීර ස්කන්ධ දර්ශකයක් සහිත දරුවන් වැඩිම පිරිසක් වාර්තා වන්නේ චීනයෙන් (මිලියන 62) සහ ඉන්දියාවෙනි (මිලියන 41). ඇමරිකා එක්සත් ජනපදයේ දරුවන් පස් දෙනෙකුගෙන් දෙදෙනෙකුම මෙම අවදානමට මුහුණ දී සිටින අතර, බ්රිතාන්යය ද යුරෝපයේ නරකම දත්ත වාර්තා කරන රටක් බවට පත්ව තිබේ. අඩු සහ මධ්යම ආදායම් ලබන රටවල ද මෙම තත්ත්වය ශීඝ්රයෙන් වර්ධනය වෙමින් පවතින බව වාර්තා වේ. අධික රුධිර පීඩනය සහ හෘද රෝග වැනි වැඩිහිටියන්ට වැළඳෙන රෝග කුඩා දරුවන් අතර ව්යාප්ත වීම අනාගත පරපුරේ සෞඛ්යයට එල්ල වන ප්රබල තර්ජනයකි.
ලෝක සෞඛ්ය සංවිධානයේ (WHO) විශේෂඥයන් පවසන්නේ දරුවන්ගේ මෙම සෞඛ්ය පරිහානියට ප්රධාන හේතුව ඔවුන් ජීවත් වන වටපිටාව සහ ආහාර පරිභෝජන රටාව බවයි. පෝෂ්යදායී ආහාර වෙනුවට සීනි අධික පාන වර්ග සහ ‘ජන්ක් ෆුඩ්’ (Junk food) සඳහා දරුවන් යොමු කිරීම වැළැක්වීමට රජයන් මැදිහත් විය යුතු බව ඔවුහු පවසති. මේ සඳහා සීනි බදු පැනවීම, අහිතකර ආහාර ප්රචාරණය සීමා කිරීම සහ දරුවන් ක්රියාශීලී ජීවන රටාවකට යොමු කරන ප්රතිපත්ති සකස් කිරීම අත්යවශ්ය වේ. ඇතැම් රටවල් දැනටමත් රාත්රී 9ට පෙර රූපවාහිනියේ සහ අන්තර්ජාලයේ මෙවැනි ආහාර වෙළඳ දැන්වීම් පාලනය කිරීමට පියවර ගනිමින් සිටී.
