චීනයේ දේශපාලන ගමන්මග තීරණය කෙරෙන වැදගත්ම සැසිවාරයක් වන 14 වැනි චීන ජාතික මහජන කොංග්රසයේ සිව්වන සැසිවාරයේ දෙවන පූර්ණ රැස්වීම ඊයේ බෙයිජිංහි මහජන මහා ශාලාවේදී ආරම්භ විය. චීන ජනාධිපති ෂී ජින්පින් මහතා ඇතුළු චීන කොමියුනිස්ට් පක්ෂයේ සහ රාජ්යයේ ඉහළ පෙළේ නායකයින්ගේ සහභාගීත්වයෙන් පැවැති මෙම රැස්වීමේදී පසුගිය වසරේ සිදුවූ නීතිමය සහ පාලන ප්රගතිය පිළිබඳව දීර්ඝ ලෙස සමාලෝචනය කෙරිණි. මෙහිදී අදහස් දැක්වූ ස්ථාවර කමිටු සභාපති ජාඕ ලෙජි මහතා සඳහන් කළේ පසුගිය වසර තුළ නීතිමය අර්ථකථන සහ තීරණ කෙටුම්පත් 40ක් අධීක්ෂණය කර ඇති අතර ජාත්යන්තර වශයෙන් වැදගත් වන ගිවිසුම් 9ක් ද අනුමත කිරීමට පියවර ගෙන ඇති බවයි.
එමෙන්ම මෙම පූර්ණ රැස්වීමේදී චීන මහජන ශ්රේෂ්ඨාධිකරණයේ සභාපති ජෑං ජුන් මහතා විසින් 2025 වසරේ කාර්ය සාධන වාර්තාව ද ඉදිරිපත් කළේය. එම වාර්තාවට අනුව ජාතික ආරක්ෂාව තහවුරු කිරීම සහ රාජ්ය බලය කඩාකප්පල් කිරීමට දරන උත්සාහයන් මැඩපැවැත්වීම සඳහා අධිකරණය දැඩි ලෙස ක්රියා කර ඇති අතර බෙදුම්වාදය, ත්රස්තවාදය සහ මිථ්යාදෘෂ්ටික ක්රියාවන්ට එරෙහිව නීතිය තදින්ම ක්රියාත්මක කර තිබේ. විශේෂයෙන්ම “තායිවාන බෙදුම්වාදීන්ට” එරෙහිව පසුගිය වසරේදී දැඩි දඬුවම් පැනවූ බව ද එම වාර්තාවේ අවධාරණය කර ඇත. චීනය තුළ සුළුජාතීන් ඉලක්ක කරගනිමින් හඳුන්වා දීමට නියමිත නව ‘ජාතික සමගිය’ නීතිය පිළිබඳ පසුබිම තුළ මෙම පූර්ණ රැස්වීමේ තීරණ ඉතා තීරණාත්මක වනු ඇතැයි විශ්ලේෂකයෝ පෙන්වා දෙති.
