කොවිඩ්-19 වසංගත තත්ත්වය හේතුවෙන් 2020 වසරේදී අත්හිටුවන ලද චීනය සහ උතුරු කොරියාව අතර මගී දුම්රිය සේවාව වසර හයක විරාමයකින් පසු යළි ආරම්භ කිරීමට එරට දුම්රිය බලධාරීන් පියවර ගෙන තිබේ. දෙරට අතර දේශසීමා සබඳතා යළි ශක්තිමත් කිරීමේ නව පියවරක් ලෙස සැලකෙන මෙම දුම්රිය සේවාව ඊයේ (මාර්තු 12) සිට ක්රියාත්මක විය.
චීන අගනුවර වන බීජිං සිට උතුරු කොරියාවේ පියොන්යැං දක්වා ගමන් ගන්නා මෙම පළමු දුම්රිය ටියැන්ජින් වරාය නගරය ඇතුළු ස්ථාන කිහිපයක නතර කරමින් උතුරු කොරියානු දේශසීමාවේ පිහිටි දැන්ඩොං (Dandong) නගරය වෙත ළඟා වීමට නියමිතය. උතුරු කොරියාවේ සංචාරය කිරීමට අපේක්ෂා කරන මගීන් රැගත් මැදිරි එහිදී තවත් දුම්රියකට සම්බන්ධ කර දේශසීමාව හරහා සිනුයිජු (Sinuiju) නගරය වෙත රැගෙන යාමට සැලසුම් කර ඇති බව සංචාරක නියෝජිත ආයතන සඳහන් කරයි.
උතුරු කොරියාවේ විශාලතම වෙළඳ සහකරුවා මෙන්ම එරටට රාජ්ය තාන්ත්රික හා ආර්ථික සහය ලබා දෙන ප්රධානතම රට චීනයයි. වසංගතය වැළැක්වීම සඳහා පැනවූ දැඩි දේශසීමා නීති ලිහිල් කරමින් මෙම ප්රවාහන සබඳතාව යළි ස්ථාපිත කිරීම දෙරටේ ආර්ථික මෙන්ම සංචාරක කටයුතුවල පිබිදීමකට හේතු වනු ඇතැයි අපේක්ෂා කෙරේ.
