චීනය විසින් තායිවානය තම පාලනයට නතු කර ගැනීම සඳහා 2027 වසරේදී යුදමය ආක්රමණයක් දියත් කිරීමට දැනට සැලසුම් කර නොමැති බව ඇමරිකානු බුද්ධි අංශ මගින් නිකුත් කරන ලද වාර්ෂික තර්ජන ඇගයීමේ වාර්තාවක සඳහන් වේ. චීනය තායිවානය සමඟ යළි ඒකාබද්ධ වීමේදී බලහත්කාරය හෝ යුධ බලය භාවිතා කිරීමට වඩා සාමකාමී ක්රමවේදයන් කෙරෙහි වැඩි කැමැත්තක් දක්වන බව එම වාර්තාව පෙන්වා දෙයි.
ඇමරිකානු ජනාධිපති ඩොනල්ඩ් ට්රම්ප් සහ චීන නායක ෂී ජින්පිං අතර පවතින සබඳතාවය හමුවේ, ට්රම්ප් සිය ධුර කාලය තුළ චීනය විසින් තායිවානයට ප්රහාර එල්ල නොකරනු ඇතැයි විශ්වාසය පළ කර තිබේ. කෙසේ වෙතත්, චීන මහජන විමුක්ති හමුදාව (PLA) 2027 වන විට ඕනෑම අවස්ථාවක තායිවානය අත්පත් කර ගැනීමට අවශ්ය යුධ ශක්තිය වර්ධනය කර ගනිමින් සිටින බව මීට පෙර පෙන්ටගනය අනතුරු අඟවා තිබුණි. චීනය තායිවානය තම දේශසීමාවට අයත් කොටසක් ලෙස සලකන අතර, තායිවානය ස්වයං පාලනයක් සහිත ප්රජාතන්ත්රවාදී රටක් ලෙස තම ස්වෛරීභාවය ආරක්ෂා කර ගැනීමට පෙනී සිටියි.
මීට අමතරව, ජපාන අගමැතිනි සැනේ ටකායිචි (Sanae Takaichi) විසින් තායිවානය සම්බන්ධයෙන් සිදු කරන ලද ප්රකාශ පිළිබඳව ද මෙම වාර්තාවේ අවධානය යොමු කර ඇත. චීනය විසින් තායිවානයට එල්ල කරන ඕනෑම ප්රහාරයකට ජපානය යුධමය වශයෙන් ප්රතිචාර දැක්විය හැකි බවට ඇය කළ ප්රකාශය හේතුවෙන් කලාපීය දේශපාලන උණුසුමක් ඇති වී තිබේ. මේ අතර ඇමරිකාව විසින් තායිවානයට ඩොලර් බිලියන 11ක දැවැන්ත අවි අලෙවියක් සිදු කිරීමට පියවර ගැනීම චීනයේ දැඩි කෝපයට හේතු වී ඇත.
