ලොව දෙවන විශාලතම ආර්ථිකය හිමි චීනයේ ඉදිරි ගමන්මග තීරණය කෙරෙන වසරේ වැදගත්ම දේශපාලන මහෝත්සවය වන ‘දෙමහල් සැසිය’ (Two Sessions) හෙට (බ්රහස්පතින්දා) බෙයිජිං නුවරදී ආරම්භ වීමට නියමිතය. සති දෙකකට ආසන්න කාලයක් පුරා පැවැත්වෙන මෙම සමුළුව ප්රධාන සැසිවාර දෙකකින් සමන්විත වන අතර චීන මහජන දේශපාලන උපදේශක සභාව (CPCC) සහ චීන ජාතික මහජන කොංග්රසය (NPC) මෙලෙස එක්ව රැස්වේ. මෙහිදී ඉදිරි වසර පහ සඳහා වන චීන ජනාධිපති ෂී ජින්පින්ගේ සංවර්ධන සැලසුම් සහ ආර්ථික ඉලක්ක ප්රකාශයට පත් කිරීමට නියමිත බැවින් ජාත්යන්තර ආර්ථික නිරීක්ෂකයින් මෙදෙස දැඩි උනන්දුවකින් බලා සිටියි.
මෙම සමුළුවේදී දේශීය පරිභෝජනය ඉහළ නැංවීමට සහ ආර්ථික වර්ධන වේගය ස්ථාවරව පවත්වා ගැනීමට චීනය ගන්නා උත්සාහයන් මෙන්ම, මෑතකදී හමුදා ඉහළ නිලධාරීන් ඉවත් කිරීම ඇතුළු දූෂණ විරෝධී මෙහෙයුම්වල බලපෑම පිළිබඳව ද සාකච්ඡා වනු ඇතැයි අපේක්ෂා කෙරේ. නියෝජිතයින් 3,000කට අධික පිරිසක් සහභාගී වන මෙම රැස්වීම් මාලාව හරහා චීනයේ නීති සම්පාදනය, ආණ්ඩුක්රම ව්යවස්ථාව සංශෝධනය සහ රාජ්ය අයවැය අනුමත කිරීම වැනි තීරණාත්මක කාර්යයන් ඉටු වේ. චීනය සිය ගෝලීය බලය තහවුරු කිරීමට උත්සාහ කරන මෙවන් වකවානුවක මෙම දේශපාලන එකතුව මුළුමහත් ලෝකයටම තීරණාත්මක සංඥාවක් නිකුත් කරනු ඇති බව විදේශීය මාධ්ය පෙන්වා දෙයි.
