චීන ග්රෝන් ප්රී (Chinese Grand Prix) ස්ප්රින්ට් තරගයේ ආරම්භක ස්ථානය තේරීමේ තරගයෙන් මර්සිඩීස් කණ්ඩායමේ ජෝර්ජ් රසල් විශිෂ්ට ජයක් වාර්තා කිරීමට සමත් විය. ඔහුගේ සහායක ක්රීඩක කිමී ඇන්ටොනෙලි දෙවන ස්ථානය දිනාගත් අතර, ඒ අනුව මර්සිඩීස් කණ්ඩායම සුදුසුකම් ලැබීමේ තරගයේ පළමු ස්ථාන දෙකම හිමිකර ගනිමින් සිය ආධිපත්යය පෙන්වීමට සමත් විය. රසල් සහ ඇන්ටොනෙලි අතර කාල වෙනස තත්පර 0.289ක් වූ අතර, තෙවන ස්ථානය දිනාගත් මැක්ලරන් කණ්ඩායමේ ලැන්ඩෝ නොරිස්ට වඩා රසල් තත්පර 0.621ක් ඉදිරියෙන් සිටීම විශේෂත්වයකි. පසුගිය ඉරිදා ඕස්ට්රේලියාවේදී පැවැති තරගය ද ජයගත් රසල්, දින හයක් ඇතුළත ලබාගත් දෙවන ‘Pole Position’ ජයග්රහණය මෙය ලෙස සටහන් වේ.
තරගයේ සෙසු ප්රමුඛ ස්ථාන දෙස බැලීමේදී ලුවිස් හැමිල්ටන් (ෆෙරාරි) 4 වන ස්ථානය දිනාගත්තේ නොරිස්ට වඩා තත්පර 0.02ක් පමණක් පසුපසින් සිටිමිනි. ඔස්කාර් පියස්ට්රි (මැක්ලරන්) 5 වන ස්ථානයත්, චාල්ස් ලෙක්ලර්ක් (ෆෙරාරි) 6 වන ස්ථානයත් දිනාගත් අතර ලෝක ශූර මැක්ස් වර්ස්ටැපන් (රෙඩ් බුල්) හට හිමි වූයේ 8 වන ස්ථානයයි. ඔහු රසල්ට වඩා තත්පර 1.734ක් පසුපසින් සිටීම කැපී පෙනෙන තත්ත්වයකි.
රෙඩ් බුල් කණ්ඩායමට මෙම දිනය දැඩි අභියෝගාත්මක එකක් වූ අතර, වර්ස්ටැපන් සඳහන් කළේ සිය මෝටර් රථයේ වේගය සහ සමබරතාවය අතින් මුළු දිනයම ඉතා අසතුටුදායක වූ බවයි. මේ අතර, තමන් සෘජු මාර්ගවලදී වැඩි කාලයක් වැය කරන බවත්, මර්සිඩීස් කණ්ඩායම එන්ජින් බලය අතින් ඉතා ඉහළ මට්ටමක පවතින බවත් ලුවිස් හැමිල්ටන් පවසා ඇත. හෙට පැවැත්වීමට නියමිත ස්ප්රින්ට් තරගය සඳහා රසල් ඉතා හොඳ මානසික මට්ටමකින් පසුවන බව ද වැඩිදුරටත් වාර්තා වේ.
