අත්අඩංගුවට ගත් ‘පොඩි ලැසී’ මෙරටට රැගෙන ඒම සඳහා CID කණ්ඩායමක් පිටත්ව යයි

සංවිධානාත්මක අපරාධකරුවෙකු ලෙස සැලකෙන ජනිත් මධුසංඛ නොහොත් “පොඩි ලැසී” නැමැත්තා මෙරටට රැගෙන ඒම සඳහා අපරාධ පරීක්ෂණ දෙපාර්තමේන්තුවේ (CID) නිලධාරීන් කණ්ඩායමක් ඊයේ (25) පස්වරුවේ ඉන්දියාව බලා පිටත්ව ගොස් තිබේ. සැකකරු නීතිවිරෝධී ලෙස ඉන්දියාවට ඇතුළු වීමේ චෝදනාව මත එරට ආරක්ෂක අංශ විසින් අත්අඩංගුවට ගෙන සිටි අතර, ඔහුට එරෙහිව ඉන්දියාවේ පැවති නීතිමය කටයුතු මේ වන විට අවසන් වී ඇති බව වාර්තා වේ. ඒ අනුව සැකකරු මෙරටට භාර දීමට එරට බලධාරීන් එකඟ වී ඇති අතර, අපරාධ පරීක්ෂණ දෙපාර්තමේන්තු නිලධාරීන් විසින් ඔහුව කඩිනමින් මෙරටට රැගෙන ඒමට නියමිත බව පොලිසිය තහවුරු කරයි. බරපතල ගණයේ අපරාධ රැසකට සම්බන්ධ බවට තොරතුරු අනාවරණය වී ඇති මොහු, මෙරටට රැගෙන ආ පසු එම අපරාධ සම්බන්ධයෙන් දීර්ඝ ලෙස ප්‍රශ්න කිරීමට නියමිතය.