බාල ගල්අඟුරු ප්රසම්පාදනය කිරීම හරහා රජයට සිදුකර ඇති දැවැන්ත මූල්ය පාඩුව සම්බන්ධයෙන් විධිමත් විමර්ශනයක් පවත්වන ලෙස ඉල්ලා සිවිල් සංවිධාන නියෝජිතයින් පිරිසක් අද (27) අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කළහ. බාල ඖෂධ ගෙන්වීමේ සිද්ධියේදී හිටපු අමාත්ය කෙහෙලිය රඹුක්වැල්ල මහතාට එරෙහිව නීතිය ක්රියාත්මක වූ ආකාරයටම මෙම ගල්අඟුරු ගනුදෙනුව සම්බන්ධයෙන් ද වත්මන් ජනාධිපතිවරයාගෙන් කිසිදු දේශපාලන බලපෑමක් එල්ල නොවනු ඇතැයි තමන් විශ්වාස කරන බව ඔවුහු මෙහිදී ප්රකාශ කළහ. රජයේ ප්රසම්පාදන නීති උල්ලංඝනය කරමින් සිදුකර ඇති මෙම ගනුදෙනුව පිළිබඳව සියලු තොරතුරු ඇතුළත් කරමින් මෙම පැමිණිල්ල ඉදිරිපත් කර ඇති අතර මීට වගකිවයුතු නිලධාරීන්ට එරෙහිව වහාම නීතිය ක්රියාත්මක විය යුතු බව එම නියෝජිතයින්ගේ ප්රධාන ඉල්ලීම වී තිබේ.
CIDය වෙත පැමිණිල්ල ඉදිරිපත් කිරීමෙන් අනතුරුව මාධ්ය වෙත අදහස් දැක්වූ සමගි ඒකාබද්ධ වෘත්තිය සමිති බලවේගයේ කැඳවුම්කරු ආනන්ද පාලිත මහතා පෙන්වා දුන්නේ මෙම ප්රසම්පාදන ක්රියාවලිය තුළ බරපතල අක්රමිකතා රැසක් සිදුව ඇති බවයි. විශේෂයෙන්ම නියමිත කාලයට විවෘත ටෙන්ඩර් කැඳවීම වෙනුවට හදිසි මිලදී ගැනීම් හරහා දූෂණයට මඟ පාදා ඇති බවත් ප්රමිතියෙන් තොර සහල් ආනයනය කිරීම හේතුවෙන් මීට පෙර කළු ලැයිස්තුගත කරන ලද සමාගමකටම මෙම ගල්අඟුරු ටෙන්ඩරය පිරිනමා තිබීම බරපතල ගැටලුවක් බවත් ඔහු සඳහන් කළේය. අදාළ සමාගමට ලියාපදිංචි වීම සඳහා ජූලි මාසය දක්වා අසාධාරණ ලෙස කාලය ලබා දෙමින් ඉතා පැහැදිලි දූෂණ ක්රියාවලියක් මෙහි සිදුව ඇති බවත් මෙමඟින් ජාතික විදුලිබල පද්ධතියට මෙන්ම සමස්ත රටටම විශාල මූල්ය හානියක් සිදුව ඇති බවත් ඔහු වැඩිදුරටත් අවධාරණය කළේය.
