මීතොටමුල්ල “පොතුවිල් කුඹුර” පරිශ්රයේ නීති විරෝධී ලෙස කැලිකසල බැහැර කිරීම තුළින් කොළඹ මහ නගර සභාව සහ කොලොන්නාව නගර සභාව මූලික මිනිස් අයිතිවාසිකම් උල්ලංඝනය කර ඇති බවට ශ්රේෂ්ඨාධිකරණය අද (31) ඓතිහාසික තීන්දුවක් ප්රකාශයට පත් කළේය. නීතිඥ නුවන් බෝපගේ ඇතුළු පිරිසක් ඉදිරිපත් කළ මූලික අයිතිවාසිකම් පෙත්සමක් විභාග කිරීමෙන් අනතුරුව මෙම තීන්දුව ලබා දී තිබේ.
අගවිනිසුරු ප්රීති පද්මන් සූරසේන, යසන්ත කෝදාගොඩ සහ ප්රියන්ත ප්රනාන්දු යන මහත්වරුන්ගෙන් සමන්විත විනිසුරු මඩුල්ල විසින් මෙම තීන්දුව ලබා දෙන ලදී. එහිදී සඳහන් වූයේ 2009 සිට 2017 දක්වා කාලය තුළ සිදුකළ මෙම නීති විරෝධී අපද්රව්ය බැහැර කිරීම හේතුවෙන් ආණ්ඩුක්රම ව්යවස්ථාවේ 12(1) වගන්තිය මඟින් සහතික කර ඇති සමාන ආරක්ෂාව ලැබීමේ අයිතිය උල්ලංඝනය වී ඇති බවයි. 2017 වසරේදී මෙම කුණු කන්ද නායයාමෙන් සිදු වූ බරපතළ ඛේදවාචකයට මෙම අසාර්ථක ක්රියාකලාපය සෘජුවම බලපා ඇති බව විනිසුරුවරු පෙන්වා දුන්හ.
නගර සභාවලට අමතරව, අදාළ භූමිය අපද්රව්ය බැහැර කිරීමට ලබා දීමෙන් නාගරික සංවර්ධන අධිකාරියත්, සිය වගකීම් පැහැර හැරීමෙන් බස්නාහිර පළාත් අපද්රව්ය කළමනාකරණ අධිකාරියත් අයිතිවාසිකම් උල්ලංඝනය කර ඇති බව අධිකරණය තීන්දු කළේය. කෙසේ වෙතත්, වින්දිතයන් වෙනුවෙන් දැනටමත් රුපියල් මිලියන 908කට අධික වන්දි මුදලක් ගෙවා ඇති බැවින් අලුතින් වන්දි ගෙවන ලෙස නියෝග නොකළ ශ්රේෂ්ඨාධිකරණය, මෙවැනි විනාශයන් මින් ඉදිරියට සිදු නොවීමට වගබලා ගත යුතු බවට බලධාරීන්ට දැඩි ලෙස අවවාද කළේය.
