කොළඹ මහා නගර සභා සීමාව තුළ ඩෙංගු රෝගීන් වාර්තා වීම ඉහළ යාමත් සමඟ සෞඛ්ය අමාත්යාංශයේ ජාතික ඩෙංගු මර්දන ඒකකය මඟින් විශේෂ තෙදින මර්දන වැඩසටහනක් අද (24) සිට ආරම්භ කර තිබේ. ජාතික ඩෙංගු මර්දන ඒකකයේ වැඩබලන අධ්යක්ෂ වෛද්ය කපිල කන්නන්ගර මහතා ප්රකාශ කළේ, වැඩි වශයෙන් රෝගීන් වාර්තා වන ප්රදේශ කේන්ද්ර කර ගනිමින් මෙම වැඩසටහන ක්රියාත්මක කරන බවයි.
මෙම මෙහෙයුම සඳහා මහජන සෞඛ්ය පරීක්ෂකවරුන්, ප්රජා පොලිස් ඒකක සහ ස්වේච්ඡා කණ්ඩායම් විශාල සංඛ්යාවක් සහභාගී වීමට නියමිතය. ඔවුන් විසින් නිවාස සහ පරිශ්ර පරීක්ෂා කර ඩෙංගු මදුරුවන් බෝවන ස්ථාන හඳුනාගෙන ඒවා විනාශ කිරීමටත්, මහජනතාව දැනුවත් කිරීමටත් කටයුතු කරනු ඇත. වසරේ මේ දක්වා කාලය තුළ කොළඹ නගර සභා සීමාවෙන් පමණක් ඩෙංගු රෝගීන් 889 දෙනෙකු වාර්තා වී ඇති අතර, එය දිවයිනේ ඉහළම අගය ලෙස සැලකේ.
සමස්තයක් ලෙස දිවයින පුරා මේ වසරේ මේ දක්වා ඩෙංගු රෝගීන් 12,165 දෙනෙකු වාර්තා වී ඇති බව සෞඛ්ය බලධාරීන් පෙන්වා දෙයි. කොළඹට අමතරව මාතර, ගාල්ල සහ මහනුවර යන දිස්ත්රික්කවල ද ඩෙංගු රෝගීන් වාර්තා වීම ඉහළ ගොස් ඇත. පවතින වැසි සහිත කාලගුණයත් සමඟ මදුරුවන් බෝවන ස්ථාන ශීඝ්රයෙන් ඉහළ යා හැකි බැවින්, තම වටපිටාව පිරිසිදුව තබා ගැනීමට උපරිම සහය ලබා දෙන ලෙස සෞඛ්ය අංශ මහජනතාවගෙන් ඉල්ලා සිටී.
