පසුගිය 13 වනදා වෙරළ සංරක්ෂණ දෙපාර්තමේන්තුව විසින් ඉවත් කරන ලද අහංගම, කබලාන වෙරළ තීරයේ පිහිටි තාවකාලික සංචාරක කුටි දැඩි කොන්දේසි යටතේ නැවත පවත්වාගෙන යාමට ඊයේ (14) එකඟතාව පළ විය. වෙරළ සංරක්ෂණ දෙපාර්තමේන්තුවේ සහකාර අධ්යක්ෂවරයා සහ වෙරළ සුරැකීමේ සංවිධානයේ සාමාජිකයන් අතර අහංගම පොලිස් ස්ථානයේදී පැවති සාකච්ඡාවකදී මෙම තීරණය ගෙන ඇත.
නව එකඟතාවට අනුව වෙරළ තීරයෙන් තුනෙන් දෙකක (2/3) කොටසක් මහජනතාව වෙනුවෙන් නිදහස්ව තැබිය යුතු අතර, ඉතිරි තුනෙන් එකක (1/3) ප්රමාණය පමණක් කුටි සඳහා භාවිත කළ හැකිය. එහිදී පැරණි සාමාජිකයන්ට ඇඳන් 05ක් සහ නව සාමාජිකයන්ට ඇඳන් 03ක් බැගින් වන සේ ‘සමර් හට්’ පවත්වාගෙන යාමට අවසර හිමිව තිබේ. වෙරළේ අනවසර ඉදිකිරීම් ඉවත් කිරීමට ගිය අවස්ථාවේ ඇති වූ උණුසුම් තත්ත්වය හමුවේ පොලිසිය මැදිහත් වී මෙම සාකච්ඡාව සංවිධානය කර තිබුණි.
