පොදු ව්යාපාර පිළිබඳ කාරක සභාවේ (COPE) සභාපතිවරයාගේ ක්රියාකලාපය සම්බන්ධයෙන් සමගි ජන බලවේගයේ පාර්ලිමේන්තු මන්ත්රී නලින් බණ්ඩාර මහතා සහ සභානායක බිමල් රත්නායක මහතා අතර අද (06) පෙරවරුවේ පාර්ලිමේන්තුවේදී උණුසුම් වචන හුවමාරුවක් ඇති විය.
කෝප් කමිටු සභාපතිවරයා අද දිනයේ නොරොච්චෝලේ බලාගාරය පරීක්ෂා කිරීමට ගොස් ඇති බව පෙන්වා දුන් නලින් බණ්ඩාර මහතා, කෝප් සභාපතිවරයා සිටින්නේ “ඩෝබි වැඩ” කිරීමට නොවන බව පවසමින් සිය විරෝධය පළ කළේය.
ඊට පිළිතුරු දෙමින් සභානායක බිමල් රත්නායක මහතා ප්රකාශ කළේ කට තිබූ පලියට වාචාල කතා නොකියන ලෙසයි. පාර්ලිමේන්තු කමිටුවල සභාපතිවරුන්ට විමර්ශන සහ සොයා බැලීම් කිරීමට පූර්ණ අයිතිය ඇති බවත්, ඔවුන් වගකීමෙන් යුතුව සිය රාජකාරි ඉටු කරන බවත් ඔහු අවධාරණය කළේය. පදනම් විරහිතව චෝදනා එල්ල නොකරන ලෙස සභානායකවරයා වැඩිදුරටත් සඳහන් කළේය.
මෙහිදී නලින් බණ්ඩාර මහතා යළිත් අදහස් දැක්වීමට උත්සාහ කළ ද ඔහුට ඒ සඳහා අවස්ථාව හිමි නොවූ අතර සභාවේ උණුසුම්කාරී තත්ත්වයක් ද දක්නට ලැබිණි.
