ත්රිකුණාමලය ශ්රී සම්බුද්ධ ජයන්ති බෝධිරාජ විහාරයේ කොටසක් කඩා ඉවත් කරන ලෙස වෙරළ සංරක්ෂණ දෙපාර්තමේන්තුව නිකුත් කළ නියෝගය වළක්වන ලෙස ඉල්ලා ගොනු කර ඇති රිට් පෙත්සම ලබන අප්රේල් මස 28 වනදා යළි කැඳවීමට අභියාචනාධිකරණය අද (20) තීන්දු කළේය.
මෙම පෙත්සම ඉදිරිපත් කර තිබුණේ අදාළ විහාරස්ථානයේ විහාරාධිපති පූජ්ය ත්රිකුණාමලයේ කල්යාණ වංශ තිස්ස හිමියන් විසිනි. විහාරස්ථානයේ ඉදිකිරීමක් ඉවත් කරන ලෙසට වෙරළ සංරක්ෂණ දෙපාර්තමේන්තුව නිකුත් කළ නියෝගය නීතිවිරෝධී බවත්, එය ක්රියාත්මක කිරීම වළක්වාලන රිට් ආඥාවක් නිකුත් කරන ලෙසත් පෙත්සම්කාර හිමියන් සිය පෙත්සමෙන් ඉල්ලා තිබේ.
අභියාචනාධිකරණ විනිසුරුවරුන් වන ධම්මික ගනේපොල සහ ආදිත්ය පටබැඳිගේ යන මහත්වරුන්ගෙන් සමන්විත විනිසුරු මඩුල්ල ඉදිරියේ අද මෙම පෙත්සම කැඳවනු ලැබීය. එහිදී කරුණු සලකා බැලූ විනිසුරු මඩුල්ල, මෙම ආරවුල සමථයකට පත් කරගැනීමේ හැකියාව පිළිබඳව සොයා බැලීම සඳහා නඩුව අප්රේල් මස 28 වනදා දක්වා කල් තැබීමට නියම කළේය.
මෙම සිද්ධිය ත්රිකුණාමලය ප්රදේශයේ ආගමික සහ සංස්කෘතික වශයෙන් දැඩි අවධානයට ලක්ව ඇති කරුණක් වන අතර, ඉදිරි නඩු වාරයේදී මේ සම්බන්ධයෙන් අවසන් එකඟතාවක් ඇතිවනු ඇතැයි අපේක්ෂා කෙරේ.
