නිරිතදිග ඉන්දියන් සාගර කලාපයේ හටගත් “ගෙසානි” (Gezani) දැඩි නිවර්තන සුළි කුණාටුව මැඩගස්කරයට ඇතුළු වීමෙන් එරට දැඩි විනාශයකට මුහුණ දී ඇති අතර, මේ වන විට මැඩගස්කර රජය ජාතික හදිසි අවස්ථාවක් ප්රකාශයට පත් කරමින් ජාත්යන්තර ආධාර ඉල්ලා තිබේ. පෙබරවාරි 10 වැනිදා පැයට කිලෝමීටර් 180ක වේගයෙන් හමා ආ සුළං සහ පැයට කිලෝමීටර් 230ක උපරිම වේගයකින් යුත් සුළං ප්රහාර සමඟ මෙම කුණාටුව නැගෙනහිර මැඩගස්කරයේ ටොමාසිනා (Toamasina) වරාය නගරයට ඇතුළු විය. මෙම ස්වභාවික විපතින් පුද්ගලයන් 40 දෙනෙකු මියගොස් ඇති අතර 270,000කට අධික පිරිසක් පීඩාවට පත්ව 16,000ක පමණ පිරිසක් අවතැන් වී සිටින බව එරට නිල වාර්තා සනාථ කරයි.
මෙම විනාශය තවත් දරුණු වී ඇත්තේ ජනවාරි මස අගදී බලපෑ “ෆිටියා” (Fytia) සුළි කුණාටුවෙන් පසු කෙටි කලක් ඇතුළත ගෙසානි කුණාටුව පැමිණීම හේතුවෙනි. දැනට ලැබී ඇති පූර්ව අනතුරු ඇඟවීම්වලට අනුව, මැඩගස්කරයෙන් නික්ම මොසැම්බික් සමුද්ර සන්ධිය හරහා ගමන් කරන ගෙසානි කුණාටුව පෙබරවාරි 13 සහ 14 යන දිනවල මොසැම්බික් රාජ්යයේ දකුණුදිග වෙරළ තීරයට ළඟා වීමට නියමිතය. මොසැම්බික්හි ඉන්හම්බනේ (Inhambane) ප්රදේශයට ඉතා ප්රබල සුළං, අධික වර්ෂාව, මීටර් 10ක් පමණ උසැති රළ සහ කුණාටු රළ (Storm surge) ඇති විය හැකි බව කාලගුණ අනාවැකි පෙන්වා දෙයි.
ලෝක කාලගුණ විද්යා සංවිධානයේ (WMO) සම්බන්ධීකරණ යාන්ත්රණය හරහා ලබා දුන් පූර්ව අනතුරු ඇඟවීම් හේතුවෙන් සහන සේවා කණ්ඩායම්වලට ජීවිත බේරා ගැනීමටත්, අවශ්ය ආහාර සහ මුදල් ආධාර කලින් සූදානම් කර ගැනීමටත් හැකි වී තිබේ. 2025-2026 නිවර්තන සුළි කුණාටු සමය තුළ නම් කරන ලද කුණාටු 10ත් 14ත් අතර සංඛ්යාවක් ඇති විය හැකි බවත්, ඉන් 5ත් 8ත් අතර ප්රමාණයක් ප්රබල සුළි කුණාටු බවට පත් විය හැකි බවත් විශේෂඥයෝ පවසති. මෙම තත්ත්වය හමුවේ දකුණුදිග මොසැම්බික් වැසියන්ට ගංවතුර සහ හදිසි ජල ගැලීම් පිළිබඳව දැඩි අවධානයෙන් පසුවන ලෙස උපදෙස් දී ඇත.
