ඇමරිකා එක්සත් ජනපදයේ ඔහියෝ (Ohio) ප්රාන්තයේ කොලම්බස් හි පිහිටි හොරයිසන් සයන්ස් ඇකඩමියේ (Horizon Science Academy) සේවය කළ 28 හැවිරිදි හිටපු ගුරුවරියක වන ජමෙලා දබූබි (Jamelah Daboubi), තම 10 වන ශ්රේණියේ ඉගෙනුම ලැබූ 15 හැවිරිදි සිසුවෙකු සමඟ ලිංගික සබඳතා පැවැත්වීමේ චෝදනාවලට අධිකරණය ඉදිරියේ වරදකරු වී තිබේ. ෆ්රෑන්ක්ලින් ප්රාන්ත පොදු අභියාචනාධිකරණයේදී ඇය මෙම වරද පිළිගෙන ඇති අතර, බාල වයස්කරුවෙකු සමඟ නීති විරෝධී ලිංගික හැසිරීම් සහ ලිංගික අපරාධ සම්බන්ධයෙන් ඇයට එරෙහිව චෝදනා ගොනු කර තිබුණි.
මෙම සිද්ධිය අනාවරණය වී ඇත්තේ 2025 අප්රේල් මාසයේදී වන අතර, අදාළ සිසුවාගේ භාරකාරීත්වය දරන නැන්දා විසින් සිය බෑණනුවන් සහ ගුරුවරිය මෝටර් රථයක් තුළ සිටියදී අල්ලාගෙන පොලිසියට දැනුම් දී ඇත. පොලිස් විමර්ශනවලදී හෙළි වී ඇත්තේ මොවුන් දෙදෙනා අතර දීර්ඝ කාලයක සිට දුරකථන ඇමතුම් සිය ගණනක් සහ කෙටි පණිවිඩ දහස් ගණනක් හුවමාරු වී ඇති බවයි. සිද්ධිය වාර්තා වීමත් සමඟ වහාම ක්රියාත්මක වූ පාසල් බලධාරීන් ඇයව සේවයෙන් ඉවත් කිරීමට පියවර ගෙන තිබුණි.
අධිකරණය විසින් ඇයට වසර පහක ප්රජා මට්ටමේ අධීක්ෂණ දඬුවම් (Community Control), අඛණ්ඩ මනෝ උපදේශනය සහ ප්රජා සේවය නිර්දේශ කර ඇති අතර, ඇයගේ ගුරු බලපත්රය ද ස්ථිරවම අහෝසි කිරීමට නියෝග කර ඇත. මීට අමතරව, ඇය දෙවන මට්ටමේ (Tier II) ලිංගික අපරාධකාරියක ලෙස ලියාපදිංචි විය යුතු බවට ද අධිකරණය නියම කර තිබේ. මෙම නඩුවේ අවසන් තීන්දුව ප්රකාශයට පත් කිරීම සඳහා නව දිනයක් ඉදිරියේදී ප්රකාශයට පත් කිරීමට නියමිතය.
