ඇමරිකා එක්සත් ජනපදයේ මැසචුසෙට්ස් ප්රාන්තයේ ඩැන්වර්ස්හිදී (Danvers), 2024 වසරේදී විශේෂ අවශ්යතා සහිත පුද්ගලයෙකුට බරපතල ලෙස පහර දුන් යෞවනයන් පිරිසකට එරෙහිව ලබා දුන් අධිකරණ තීන්දුව පිළිබඳව ඔහුගේ මව දැඩි විරෝධය පළ කර තිබේ. ඇන්ටොනෙට් ඇන්ඩර්සන් පවසන්නේ සිය පුතුට මාරාන්තික ප්රහාරයක් එල්ල කළ පිරිසට සිරදඬුවම් වෙනුවට පරිවාස දඬුවම් පමණක් හිමි වීම තමාට දරාගත නොහැකි බවයි.
ප්රහාරයට ලක්ව ඇත්තේ 45 හැවිරිදි ක්රිස් ඇන්ඩර්සන් (Chris Anderson) නමැති පුද්ගලයෙකි. 2024 ඔක්තෝබර් මාසයේදී යෞවනයන් සිව්දෙනෙකු විසින් ඔහුව රහසිගතව පාසලක් පිටුපස කැලෑවකට රැගෙන ගොස් ඇති අතර, එහිදී ඔහුගේ විද්යුත් බයිසිකලයෙන් ඇද දමා ඔහුට අමානුෂික ලෙස පහර දී ඇත. මෙම ප්රහාරය හේතුවෙන් ක්රිස්ගේ ඉළ ඇට බිඳී ඇති අතර ඔහුගේ සිරුර පුරා තුවාල සිදු වී තිබේ. තවමත් තමා දැඩි ශාරීරික හා මානසික වේදනාවෙන් පසුවන බවත්, තමාට නිසි යුක්තිය ඉටු නොවූ බවත් ක්රිස් ප්රකාශ කර ඇත.
අධිකරණය හමුවේ වරදකරුවන් වූ යෞවනයන්ට ඔවුන්ගේ වයස අවුරුදු 19 වන තෙක් පරිවාස කාලයකට යටත් වීමටත්, වින්දිතයාගෙන් ඈත්ව සිටීමටත් නියෝග කර තිබේ. මැසචුසෙට්ස් ප්රාන්ත නීතියට අනුව වයස අවුරුදු 14 ට අඩු පුද්ගලයින්ට එරෙහිව දැඩි දණ්ඩන ක්රියාමාර්ග ගත නොහැකි වීම හේතුවෙන් මෙම තීන්දුව ලබා දී ඇති බව නීති අංශ පෙන්වා දෙයි. කෙසේ වෙතත්, මෙම නීතිය සමඟ තමා එකඟ නොවන බවත්, අහිංසක පුද්ගලයෙකුට මෙලෙස හිරිහැර කරන අයට දැඩි දඬුවම් ලැබිය යුතු බවත් මව අවධාරණය කරයි.
