වත්මන් ආණ්ඩුව නියෝජනය කරන ප්රාදේශීය සභා සහ නගර සභා මන්ත්රීවරුන් ඇතුළු පිරිසක් මත්ද්රව්ය ජාවාරම්වල නිරත වන බවත්, වැටලීම්වලදී ඔවුන් නිරන්තරයෙන් අසුවන බවත් පාර්ලිමේන්තු මන්ත්රී දයාසිරි ජයසේකර මහතා පාර්ලිමේන්තුවේදී පැවසීය. ආණ්ඩුව මත්ද්රව්ය මර්දනය ගැන කතා කළද ආණ්ඩුව තුළම සිටින පිරිස් මෙයට සම්බන්ධ වීම බරපතළ තත්ත්වයක් බව ඔහු පෙන්වා දුන්නේය. මීට අමතරව කොළඹ දිසාධිකරණයේ සේවකයන්ට මූලික වැසිකිළි පහසුකම් පවා නොමැති වීම සහ විනිසුරුවරුන්ගේ උසස්වීම් පටිපාටියේ පවතින ගැටලු පිළිබඳව ද ඔහු මෙහිදී කරුණු අනාවරණය කළේය.
මුස්ලිම් ජනතාව මුහුණ දෙන ගැටලු පිළිබඳව අදහස් දක්වමින් මන්ත්රීවරයා කියා සිටියේ, වකුෆ් සභාවට සාමාජිකයන් පත් කිරීමේදී බුද්ධි අංශ වාර්තා ලබා ගැනීම අනිවාර්ය කිරීම සහ වරායේ සිරවී ඇති කුරාන් පොත් 1,500ක් මුදා හැරීමට ආරක්ෂක අමාත්යාංශය අවසර නොදීම කනගාටුදායක බවයි. මෙම කරුණුවලට පිළිතුරු දෙමින් අධිකරණ අමාත්යවරයා සඳහන් කළේ, පාස්කු ප්රහාරය වැනි විශාල නඩු කඩිනමින් විභාග කිරීම යුක්තිය ඉටු කිරීමට අත්යවශ්ය බවත්, විනිසුරුවරුන්ගේ උසස්වීම් අධිකරණ සේවා කොමිෂන් සභාව මගින් ස්වාධීනව තීරණය කරන බවත්ය.
