රුපියල් 50,000ක අල්ලස් මුදලක් ලබාගැනීමේ චෝදනාව මත අත්අඩංගුවට ගත් දෙහිඅත්තකණ්ඩිය කලාප අධ්යාපන අධ්යක්ෂවරයා සහ එම කාර්යාලයට අනුයුක්තව සේවය කළ ගුරු උපදේශකවරයා ලබන මාර්තු මස 3 වැනිදා දක්වා රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අසංග එස්. බෝදරගම මහතා අද (20) නියෝග කළේය. සේවය හැර ගොස් සිට නැවත සේවයට එක්වූ පුද්ගලයෙකුගේ පත්වීම් කාලය දීර්ඝ කර දීම සඳහා මොවුන් දෙදෙනා මෙම අල්ලස් මුදල ඉල්ලා ඇති බව අල්ලස් කොමිසමේ නිලධාරීන් අධිකරණයට කරුණු දක්වමින් ප්රකාශ කළහ.
අදාළ පුද්ගලයා විසින් සිදුකළ පැමිණිල්ලකට අනුව වැටලීමක් සිදුකළ අල්ලස් කොමිසමේ නිලධාරීන්, දෙහිඅත්තකණ්ඩිය කලාප අධ්යාපන කාර්යාලය තුළදීම මෙම අල්ලස් මුදල ලබාගන්නා අවස්ථාවේදී සැකකරුවන් අත්අඩංගුවට ගෙන තිබුණි. මීට පෙර දෙහිඅත්තකණ්ඩිය මහේස්ත්රාත් අධිකරණය හමුවට ඉදිරිපත් කිරීමෙන් පසු අද දක්වා රක්ෂිත බන්ධනාගාරගත කර සිටි සැකකරුවන් දෙදෙනා, නඩුව අද දින කොළඹ මහේස්ත්රාත් අධිකරණයේදී කැඳවූ අවස්ථාවේදී මෙලෙස යළි රක්ෂිත බන්ධනාගාරගත කෙරිණි.
