බ්රිතාන්යයේ සුප්රසිද්ධ අද්මිරාල් හොරාටියෝ නෙල්සන් (Horatio Nelson) ඇතුළු රාජකීය නාවික බලඇණිය විසින් ප්රහාර එල්ල කර ගිල්වා දමා වසර 200කට වැඩි කාලයකට පසු, ඩෙන්මාර්කයට අයත් පැරණි යුද නෞකාවක සුන්බුන් කෝපන්හේගන් වරායේ මුහුදු පත්ලෙන් සොයා ගැනීමට සමුද්ර පුරාවිද්යාඥයින් සමත්ව තිබෙනවා.
ඩෙන්මාර්කයේ වෙරළ ආසන්නයේ අලුතින් නිවාස සංකීර්ණයක් ඉදිකිරීමට සැලසුම් කර ඇති අතර එම ඉදිකිරීම් කටයුතු ආරම්භ කිරීමට පෙර අදාළ මුහුදු සීමාව පරීක්ෂා කිරීමේදී මෙම ඓතිහාසික නෞකාවේ සුන්බුන් හමු වී තිබෙනවා. ඒ අනුව වරාය පතුලේ ඇති පැරණි නෞකාවේ කොටස් ගොඩගැනීම සඳහා කිමිදුම්කරුවන් පිරිසක් දැඩි උත්සාහයක නිරත වුණා.
මුහුදු රළ මට්ටමේ සිට මීටර් 15 ක් (අඩි 49 ක්) පමණ ගැඹුරින්, ඉතා ඝන අවසාදිත තට්ටුවලට යටවී සහ කිසිවක් පැහැදිලිව නොපෙනෙන (Zero Visibility) අඳුරු ස්වභාවයක් යටතේ තිබියදී මෙම ඩෙන්මාර්ක යුද නෞකාව සොයා ගැනීමට හැකි වීම විශේෂත්වයක්. ඉතිහාසඥයන් පවසන්නේ මෙය 1801 වසරේදී බ්රිතාන්ය සහ ඩෙන්මාර්කය අතර පැවති සුප්රසිද්ධ ‘කෝපන්හේගන් සටන’ (Battle of Copenhagen) අතරතුර ගිල්වා දැමූ නෞකාවක් විය හැකි බවයි.
