මහජනතාව අනවශ්ය ලෙස බිය වී ඉන්ධන රැස් කිරීමට පෙළඹුණහොත් පමණක් නැවතත් QR කේත ක්රමය හඳුන්වා දීමට පියවර ගන්නා බව බලශක්ති නියෝජ්ය අමාත්ය මොහොමඩ් ඉල්යාස් මොහොමඩ් අර්කම් පවසයි. මාධ්ය වෙත අදහස් දක්වමින් ඔහු සඳහන් කළේ, රට තුළ දැනට මාසයකට වැඩි කාලයකට ප්රමාණවත් ඉන්ධන තොග පවතින බැවින් මහජනතාව කලබල විය යුතු නැති බවයි. කෙසේ වෙතත්, අවශ්ය ප්රමාණයට වඩා ඉන්ධන ලබාගෙන රැස් කිරීමට ජනතාව කටයුතු කළහොත් ඉන්ධන බෙදාහැරීමේ ක්රියාවලියට බාධා එල්ල විය හැකි බවත්, එවැනි තත්ත්වයක් පාලනය කර නිසි ලෙස කළමනාකරණය කිරීම සඳහා පමණක් QR ක්රමය යළිත් ක්රියාත්මක කිරීමට සිදුවන බවත්, ඒ සම්බන්ධයෙන් සාකච්ඡා සිදුකරමින් පවතින බවත් ඔහු වැඩිදුරටත් සඳහන් කළේය.
මේ අතර ලංකා ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා මහතා ද අවධාරණය කළේ පෞද්ගලික නිවාසවල ඉන්ධන රැස්කර තැබීම නීති විරෝධී ක්රියාවක් බවයි. එවැනි පුද්ගලයින්ට එරෙහිව දැඩි නීතිමය ක්රියාමාර්ග ගන්නා ලෙස පොලීසියෙන් ඉල්ලීමක් කර ඇති බව ද ඔහු පැවසීය. රජයේ නිවාඩු දිනයක් වූ අද (01) දිනයේ ද සේවක සහාය ඇතිව අඛණ්ඩව ඉන්ධන බෙදාහැරීම් සිදුකර ඇති අතර, හෙට (02) දිනයේ ද සාමාන්ය පරිදි බෙදාහැරීම් සිදුවන බැවින් පෝලිම් ඇති කර ගැනීමට හෝ අනවශ්ය ලෙස ඉන්ධන රැස් කිරීමට අවශ්ය නොවන බව සංස්ථාව අවධාරණය කරයි.
ලෝක වෙළඳපොළේ තෙල් මිල 10%කින් ඉහළ ගොස් තිබුණද, ශ්රී ලංකාවට අවශ්ය ඉන්ධන තොග ප්රමාණවත් පරිදි පවතින බව රජය සහතික කරයි. මැදපෙරදිග අර්බුදය හමුවේ හෝමුස් සමුද්ර සන්ධිය වසා දැමීමට ඉරානයට මෙතෙක් අදහසක් නොමැති බව ප්රකාශ වී ඇති බැවින් නාවික සැපයුම් මාර්ග පිළිබඳව ද දැඩි බියක් ඇති කර ගත යුතු නැත. එබැවින් පවතින තොග කළමනාකරණය කර ගැනීමට සහ ජනතාවට බාධාවකින් තොරව ඉන්ධන ලබා දීමට රජය ගන්නා උත්සාහයට සහාය වන ලෙස බලධාරීන් ඉල්ලා සිටියි.
