දියුණු රටවල් වයස්ගත පුරවැසියන්ට ප්‍රතිකාර කිරීම ප්‍රතික්ෂේප කලත් ශ්රී ලංකාව ඒ අයට ඉහළ අවධානයක් යොමු කළා -සෞඛ්‍ය ඇමති
ගෝලීය කොවිඩ් වසංගතය හමුවේ ලොව ඇතැම් දියුූණු රටවල වයස්ගත පුරවැසියන් සඳහා ප්‍රතිකාර කිරීම ප්‍රතික්ෂේප කරන විට මෙරට එවැනි වයස්ගත පුරවැසියන් සඳහා ඉහළ අවධානයක් ලබා දුන් බව සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතා පවසයි.
ඇතැම් රටවල් ක්‍රියාත්මක කළ එවැනි වැඩපිළිවෙලවල් හේතුවෙන් එම රටවල අවුරුදු 60 ඉක්ම වූ පිරිස්හි මරණ සංඛ්‍යාව ඉහළ ගිය බවත්, අප රට ක්‍රියාත්මක කළ වැඩපිළිවෙල හේතුවෙන් මෙරට කොවිඩ් වසංගත තත්ත්වය පාලනය කරගත හැකි වූ බවත් අමාත්‍යවරයා මෙහිදී කීය.
අමාත්‍යවරයා මේ බව පැවසුවේ යුනිසෙෆ් සංවිධානයේ මෙරට නියෝජිත ක්‍රිස්ටියන් ස්කූග් මහතා අද (14) සෞඛ්‍ය අමාත්‍යාංශයේදී හමු වූ අවස්ථාවේදීය.
මෙරට ක්‍රියාත්මක කළ ගෘහස්ථ කොවිඩ් ප්‍රතිකාර වැඩපිළිවෙල රටෙහි කොවිඩ් පාලනයට වඩාත් සාර්ථක ප්‍රතිඵල ලබාදුන් බවද එමගින් රෝහල්හි අනවශ්‍ය තදබදය වැළකී රෝගීන් අපහසුතාවයෙන් මුදා ගැනීමට හැකි වූ බවද අමාත්‍යවරයා කීය. ගෘහස්ථ ප්‍රතිකාර ලබමින් සිටි රෝගීන්ගෙන් 1.4% පමණ අවම පිරිසක් පමණක් රෝහල් කරා යොමු කළ බවද අමාත්‍යවරයා මෙහිදී පෙන්වා දුන්නේය.
මේ වන විට කොවිඩ් පාලනයේ සාර්ථක අදියරකට ශ්රී ලංකාව පැමිණ ඇතැයිද ඒ සඳහා ජාතික හා ජාත්‍යන්තරික වශයෙන් බොහෝ සහයෝගයක් ලැබුණු බවද හෙතෙම පැවසිය.
කොවිඩ් පාලනය කෙරෙන අතරතුර රෝගීන්ගේ ශාරීරික හා මානසික සෞඛ්‍යද වඩාත් ඉහළ නැංවීමට හැකිවූ බවත් ඒ් සඳහා සෞඛ්‍ය ක්ෂේත්රයේ ඉහළ සිට පහළ දක්වා සැමගේ කැප කිරීම අගය කරන බවත් කෙහෙලිය රඹුක්වැල්ල මහතා කීය.
ලෝක ආර්ථිකයට දරුණු බලපෑමක් එල්ල වූ කොවිඩ් වසංගතය තුළ කුඩා ආර්ථිකයක් පවතින ශ්රී ලංකාවට එල්ල වූ බලපෑම ප්‍රබල යැයිද ඒ හැර අනෙකුත් බලපෑම් වලට සාර්ථකව මුහුණ දීමට රටට හැකි වී ඇතැයිද අමාත්‍යවරයා කීය.
මෙහිදී අදහස් දැක්වූ යුනිසෙෆ් සංවිධානයේ මෙරට නියෝජිත ක්‍රිස්ටියන් ස්කූග් මහතා,
ඉතා ඉහළ සංවිධානයකින් මෙන්ම කළමණාකරණයකින් යුතුව ශ්රී ලංකාවේ කොවිඩ් පාලනය මේ වන විට සිදු කර ඇතැයිද එම සාර්ථකත්වයට ප්‍රසාදය හිමි වන බවද පැවසීය. එමෙන්ම එන්නත්කරණයේ සාර්ථකත්වය මේ වන විට ශ්රී ලංකාව ඔප්පු කර ඇතැයිද ඒ වෙනුවෙන් බොහෝ කැප කිරීම් කර ඇතැයිද ස්කූග් මහතා කීය.
සාර්ථක කොවිඩ් පාලනය සේම ඉදිරියේදී මෙරට දරුවන්ගේ පෝෂණ තත්ත්වයන් පිළබඳව තවදුරටත් අවධානය යොමු කිරීම වැදගත් වනු ඇතැයිද යුනිසෙෆ් නියෝජිතවරයා වැඩිදුරටත් පැවසීය.
මෙම අවස්ථාවට සෞඛ්‍ය අමාත්‍යාංශයේ ලේකම් මේජර් ජනරාල් වෛද්‍ය සංජීව මුණසිංහ, සෞඛ්‍ය සේවා අධ්යක්ෂ ජනරාල් වෛද්‍ය අසේල ගුණවර්ධන , යුනිසෙෆ් සංවිධානයේ මෙරට කාර්යාලයේ සෞඛ්‍ය, පෝෂණ ප්‍රජා විශේෂඥ වෛද්‍ය ධම්මිකා රොවෙල් යන මහත්ම මහත්මීන් සහභාගි වූහ.