ආගමන විගමන නීති උල්ලංඝනය කළ බවට චෝදනා කරමින් හිටපු රාජ්ය අමාත්ය ඩයනා ගමගේ මහත්මියට එරෙහිව අපරාධ පරීක්ෂණ දෙපාර්තමේන්තුව ගොනුකර ඇති නඩුවේ වැඩිදුර සාක්ෂි විභාගය ලබන පෙබරවාරි 24 වැනිදා දක්වා කල් තැබීමට කොළඹ ප්රධාන මහේස්ත්රාත් අසංග එස්. බෝදරගම මහතා නියෝග කළේය. අද දින නීතිඥවරුන්ගේ වැඩ වර්ජනයක් ක්රියාත්මක වීම හේතුවෙන් සාක්ෂි විභාගය සිදු කිරීමට නොහැකි වීම නිසා මෙම තීරණය ගෙන තිබේ. නඩුව කැඳවනු ලැබූ අවස්ථාවේදී විත්තිකාර ඩයනා ගමගේ මහත්මිය සහ සාක්ෂි ලබාදීම සඳහා පැමිණි සාක්ෂිකරුවන් කිහිපදෙනෙකුම අධිකරණය හමුවේ පෙනී සිටි අතර ඔවුන්ට ඉදිරි නඩු වාරයේදී නැවත පෙනී සිටින ලෙස මහේස්ත්රාත්වරයා අවවාද කළේය.
හිටපු රාජ්ය අමාත්යවරියට එරෙහිව චෝදනා හතක් යටතේ මෙම නඩුව පවරා ඇත්තේ ආගමන විගමන පාලකවරයා වෙත ව්යාජ තොරතුරු ඉදිරිපත් කර විදේශ ගමන් බලපත්රයක් ලබා ගැනීම සහ වලංගු වීසා බලපත්ර නොමැතිව මෙරට රැඳී සිටීම වැනි බරපතල කරුණු පදනම් කරගෙනයි. විශේෂයෙන්ම 2016 වසරේ සිට වරින් වර වලංගු වීසා බලපත්ර නොමැතිව ශ්රී ලංකාව තුළ රැඳී සිටීම සහ බ්රිතාන්ය පුරවැසිභාවය හිමිව තිබියදී පාර්ලිමේන්තු මන්ත්රී ධූරයක් දැරීමට ඇය නුසුදුසු බවට ශ්රේෂ්ඨාධිකරණය ලබා දී ඇති තීන්දුව ද අපරාධ පරීක්ෂණ දෙපාර්තමේන්තුව අධිකරණයට පෙන්වා දී තිබේ.
පසුගිය නඩු වාරයේදී මෙම චෝදනාවලට තමන් නිවැරදිකාරිය බව ඩයනා ගමගේ මහත්මිය ප්රකාශ කළ අතර, ඒ අනුව නඩු විභාගය ආරම්භ කිරීමට නියමිතව තිබුණි. චුදිතට රුපියල් ලක්ෂ පහක මුදල් ඇප සහ රුපියල් මිලියන දහයක ශරීර ඇප මත මුදා හැරීමට අධිකරණය මීට පෙර නියෝග කළ අතර, ඇයගේ රාජ්ය තාන්ත්රික ගමන් බලපත්රය ද නඩු භාණ්ඩයක් ලෙස අධිකරණ සේප්පුවේ තැන්පත් කර ඇත. ලබන 24 වැනිදා මෙම නඩුව නැවත කැඳවීමේදී සාක්ෂි විභාගය ආරම්භ කිරීමට අපේක්ෂිතය.
