DIMO ආයතනයේ වෘත්තීය අධ්යාපන අංශය වන DIMO ඇකඩමිය, ජර්මනියේ සෘජු රැකියා අවස්ථා සහතික කෙරෙන නවතම “WOLT” (Warehouse Operations, Logistics and Transportation) ජර්මන් ඩිප්ලෝමා පාඨමාලාව අද (06) නිල වශයෙන් දියත් කරන ලදී. මෙම වැඩසටහන සාර්ථකව නිම කරන සිසුන් සඳහා ජර්මනියේ Mosecker GmbH & Co. KG ආයතනයේ 100% ක් රැකියා අවස්ථා හිමිවන බව DIMO ආයතනය තහවුරු කරයි.
ශ්රී ලාංකික තරුණ තරුණියන්ට ජර්මනියේ ගබඩා මෙහෙයුම් සහ ප්රවාහන ක්ෂේත්රයේ වෘත්තීය මාවතක් විවර කර දීම මෙහි ප්රධාන අරමුණයි. මෙම WOLT පාඨමාලාව ජර්මන් වාණිජ හා කර්මාන්ත මණ්ඩලයේ (AHK) විෂය නිර්දේශයට අනුකූලව සකස් කර ඇති අතර, එය හුදෙක් ශාස්ත්රීය සුදුසුකමකට එහා ගිය ප්රායෝගික පුහුණුවක් ලබා දෙන්නකි. ජර්මන් භාෂාව, සැපයුම් දාම කළමනාකරණය සහ උසස් ඉන්වෙන්ටරි කළමනාකරණය වැනි විෂය ක්ෂේත්ර රැසක් මෙයට ඇතුළත් වේ.
DIMO හි විධායක අධ්යක්ෂිකා දිල්රුක්ෂි කුරුකුලසූරිය මහත්මිය ප්රකාශ කළේ, මෙම ඩිප්ලෝමාව සැලසුම් කර ඇත්තේ ජර්මනියේ සැබෑ සේවා අවශ්යතා හඳුනාගෙන බවයි. සිසුන් පුහුණු කරන්නේ හුදෙක් න්යායාත්මක දැනුම ලබා දීමට නොව, සේවා ස්ථානයට සෘජුවම අනුයුක්ත විය හැකි වෘත්තිකයන් ලෙස බව ඇය වැඩිදුරටත් සඳහන් කළාය. මෙම පාඨමාලාව ශ්රී ලංකාවේ තෘතීයික හා වෘත්තීය අධ්යාපන කොමිෂන් සභාවේ (TVEC) අනුමැතිය ද ලබා ඇත.
WOLT වැඩසටහනේ පළමු කණ්ඩායම 2026 අප්රේල් මාසයේදී ආරම්භ වීමට නියමිතය. අ.පො.ස. (සා.පෙළ) විභාගයෙන් ගණිතය, ඉංග්රීසි හෝ විද්යාව වැනි ප්රධාන විෂයන් තුනකට ‘සම්මාන’ (B) සාමාර්ථ සහිත සිසුන්ට හෝ ඕනෑම අංශයකින් අ.පො.ස. (උ.පෙළ) සමත් සිසුන්ට මේ සඳහා අයදුම් කළ හැකිය. 1990 වසරේ සිට වෘත්තීය අධ්යාපන ක්ෂේත්රයේ ප්රමුඛයෙකු වන DIMO ඇකඩමිය, මෙමගින් මෙරට තරුණ පරපුරට ජාත්යන්තර මට්ටමේ වෘත්තීය ගරුත්වයක් ලබා දීමට අපේක්ෂා කරයි.
