මහවැලි අධිකාරිය විසින් පවරාගෙන ඇති දිවුල පතාන ග්රාමයේ පදිංචිකරුවන් ඉවත් කිරීමට පෙර, ඔවුන්ට නිසි සහනයක් හෝ විකල්ප ලබා නොදුනහොත් මෝසමක් මගින් නැවත අධිකරණයට කරුණු ඉදිරිපත් කරන ලෙස ශ්රේෂ්ඨාධිකරණය අද (13) පාර්ශ්වකරුවන්ට දැනුම් දුන්නේය. ගම්වැසියන්ට විකල්ප ස්ථාන හෝ වන්දි ලබා නොදී ඔවුන් ඉවත් කිරීමට ගෙන ඇති පියවර අභියෝගයට ලක් කරමින් ගොනු කළ පෙත්සමක් සලකා බැලූ අවස්ථාවේදී මෙම නියෝගය නිකුත් විය.
අගවිනිසුරු ප්රීති පද්මන් සූරසේන, ශිරාන් ගුණරත්න සහ අචල වෙන්ගප්පුලි යන ත්රිපුද්ගල විනිසුරු මඩුල්ල හමුවේ මෙම පෙත්සම කැඳවනු ලැබීය. එහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් විකුම් ද ආබෘෘ මහතා අධිකරණයට දැනුම් දුන්නේ, ගම්වැසියන් ඉවත් කිරීමට පෙර විධිමත් පරීක්ෂණයක් පවත්වා ඔවුන්ට වන්දි හෝ විකල්ප ඉඩම් ලබා දීමට පියවර ගන්නා බවයි.
පෙත්සම්කරුවන් වෙනුවෙන් පෙනී සිටි නීතිඥ කනිෂ්ක විතාන මහතා කළ ඉල්ලීම පරිදි, අදාළ සහන ලබා දෙන තෙක් ගම්වැසියන්ට එම ස්ථානයේම රැඳී සිටීමට ද අවසර හිමි විය. දෙපාර්ශ්වයේ එකඟතාව මත පෙත්සම් විභාගය අවසන් කිරීමට අධිකරණය තීරණය කළ අතර, යම් හෙයකින් මෙම පොරොන්දු කඩ වුවහොත් නැවත අධිකරණයේ මැදිහත්වීම ඉල්ලා සිටීමට පෙත්සම්කරුවන්ට අවස්ථාව පවතී.
