ජාතික ගුවන් සේවයේ මොස්කව් – කොළඹ සෘජු ගුවන් ගමන්, බටහිර මතවාදීන්ගේ නියෝග මත නතර නො කරන ලෙස රුසියාවේ හිටපු තානාපති උදයාංග වීරතුංග මහතා ඉල්ලා සිටි.
ඒ මහතා පැවසුවේ සංචාරක කර්මාන්තය නැවත ආරම්භ කිරීමට අගමැතිතුමා විසින් ඉදිරිපත් කරන ලද අමාත්ය මණ්ඩල සංදේශයේ ප්රතිපලයක් ලෙස එදා සිට “සංචාරක බුබුල” සංකල්පය යටතේ යුක්රේනියානු, කසාක්ස්තානු, බෙලොරුසියානු හා රුසියානු සංචාරකයන් 74,958 කට ආසන්න ප්රමාණයක් ලංකාවට පැමිණ ඇති බවයි.
එසේම පසුගිය වසරේ ජූලි මස සිට UL534 දරණ ශ්රී ලංකන් ගුවන් සේවය සතියකට දෙවරක් මොස්කව් – කොළඹ අතර ආරම්භ කළ සෘජු ගුවන් ගමන් ඉතා සාර්ථක ප්රතිඵල ලබාදී ඇති බව ද හෙතෙම පැවසිය.
එම කාලයේදී ශ්රී ලංකන් ගුවන් සමාගම රුසියාවේ සිට 6744 සංචාරකයින් ප්රමාණයක් ශ්රී ලංකාවට රැගෙන ආ අතර මේ වසරේ දී මගීන් පිරවීමේ සාධකය 96% ක් වැනි ඉහළ අගයක් වන බැවින් රජයේ කාරුණික අවධානය යොමු කර අපගේ ජාතික ගුවන් සේවයේ මොස්කව් – කොළඹ සෘජු ගුවන් ගමන්, බටහිර මතවාදීන්ගේ නියෝග මත නතර නො කිරීමට ඉල්ලා සිටින බව උදයාංග වීරතුංග මහතා වැඩිදුරටත් කියා සිටියේය.
