ඉරානයේ න්යෂ්ටික වැඩසටහන සහ වේගයෙන් වර්ධනය වන බැලස්ටික් මිසයිල පද්ධතිය විනාශ කිරීම සඳහා තමන් ඉරානයට ප්රහාර එල්ල කිරීමට නියෝග කළ බව ඇමෙරිකානු ජනාධිපති ඩොනල්ඩ් ට්රම්ප් ප්රකාශ කළේය. ධවල මන්දිරයේ පැවති විශේෂ උත්සවයකදී අදහස් දක්වමින් ඔහු කියා සිටියේ, මෙම මෙහෙයුම සති හතරත් පහත් අතර කාලයක් පවතිනු ඇතැයි තමන් කලින් ගණන් බලා තිබූ නමුත්, අවශ්ය වුවහොත් ඊට වඩා වැඩි කාලයක් මෙහෙයුම් ක්රියාත්මක කිරීමට අමෙරිකාව සූදානම් බවයි.
ඉරානයෙන් එල්ල විය හැකි තර්ජනය ඉතා ආසන්නව පැවති බවත්, මෙම “භයානක පාලන තන්ත්රය” මගින් එල්ල වන තර්ජන තුරන් කිරීමට ඇති අවසන් සහ හොඳම අවස්ථාව මෙය බවත් ට්රම්ප් අවධාරණය කළේය. මේ වන විට ඉරාන නාවික හමුදාවට අයත් නෞකා 10ක් විනාශ කර ඇති බවත්, යුද මෙහෙයුම් නියමිත කාලසටහනට වඩා වේගයෙන් සාර්ථකව ඉදිරියට යන බවත් ඔහු වැඩිදුරටත් පැවසීය. මෙම යුද්ධයේ ප්රධාන අරමුණු ලෙස ඉරානයේ මිසයිල ශක්තිය විනාශ කිරීම, ඔවුන්ගේ නාවික හමුදාව අඩපණ කිරීම සහ න්යෂ්ටික අවියක් නිෂ්පාදනය කිරීම වැළැක්වීම ඔහු පෙන්වා දුන්නේය.
මෙම සටනේදී මේ වන විට අමෙරිකානු සෙබළුන් හතර දෙනෙකු ජීවිතක්ෂයට පත්ව ඇති බව සඳහන් කළ ජනාධිපතිවරයා, ඔවුන් සිහිපත් කරමින් මෙම මෙහෙයුම නොසැලෙන අධිෂ්ඨානයෙන් යුතුව ඉදිරියට ගෙන යන බව ප්රකාශ කළේය. ඉරානය මීට පෙර අමෙරිකාව ලබා දුන් අනතුරු ඇඟවීම් නොසලකා හැරීම නිසා මෙම තීරණය ගැනීමට සිදු වූ බව ට්රම්ප්ගේ අදහසයි. කෙසේ වෙතත්, තමන් න්යෂ්ටික අවි නිෂ්පාදනය නොකරන බව ඉරානය දිගින් දිගටම පවසා තිබේ.
