වෘත්තීයවේදියෙකුට සිය රාජකාරිය නිදහසේ කරගෙන යාමට නොහැකි අනාරක්ෂිත තත්ත්වයක් වර්තමාන රජය යටතේ නිර්මාණය වී ඇති බව දෙහිවල ගල්කිස්ස නාගරික මන්ත්රී වෛද්ය චමල් සංජීව මහතා පවසයි. ඊයේ (19) සමගි ජන බලවේගයේ ප්රධාන කාර්යාලයේ පැවති මාධ්ය හමුවකදී ඔහු මේ බව ප්රකාශ කළේය.
රටේ සෞඛ්ය පද්ධතිය තුළ පවතින බරපතල අර්බුද පිළිබඳව වෛද්යවරයා මෙහිදී කරුණු කිහිපයක් පෙන්වා දුන්නේය. පිළිකා රෝගීන් සඳහා ලබා දෙන ඖෂධ කාණ්ඩ 40කට අධික ප්රමාණයක් සහ තවත් අත්යවශ්ය ඖෂධ වර්ග 100කට වැඩි ප්රමාණයක් මේ වන විට රෝහල් පද්ධතිය තුළ හිඟව පවතින බව ඔහු සඳහන් කළේය. එසේම කොළඹ ජාතික රෝහල වැනි ප්රධාන රෝහල්වල රසායනාගාර පරීක්ෂණ සහ CT ඇන්ජියෝග්රෑම් වැනි පරීක්ෂණ සිදු කර ගැනීමට රෝගීන්ට රුපියල් 40,000කට අධික මුදලක් වැය කරමින් පෞද්ගලික අංශයේ සහාය පැතීමට සිදු වී තිබේ. රෝහල් මඟින් ලබා දිය යුතු ඖෂධ ලැයිස්තුවෙන් 60%ක්ම පිටතින් මිලදී ගැනීමට රෝගීන්ට සිදු වී තිබීම අවාසනාවන්ත තත්ත්වයක් බව ද ඔහු පෙන්වා දුන්නේය.
සෞඛ්ය සහ ජනමාධ්ය අමාත්යාංශ මේ වන විට රජයේ ප්රචාරක අංශ බවට පත්ව ඇති බවට චෝදනා කළ වෛද්යවරයා, රාජ්ය මුදල් යොදා ගනිමින් විපක්ෂයට එරෙහිව මඩ ප්රචාර දියත් කිරීම සම්බන්ධයෙන් අල්ලස් කොමිසමට පැමිණිලි කිරීමට සමගි ජන බලවේගය සූදානම් බව ද පැවසීය. භාණ්ඩාගාරය පිරී ඇති බව රජය පැවසුව ද සාමාන්ය ජනතාව දැඩි ආර්ථික දුෂ්කරතාවලින් පීඩා විඳින බවත්, එම නිසා රජය කෙරෙහි පවතින ජනතා ප්රසාදය වේගයෙන් පහළ යමින් පවතින බවත් ඔහු වැඩිදුරටත් සඳහන් කළේය.
උගතුන් සහ බුද්ධිමතුන් රට තුළ රැඳී සිටියහොත් රජයේ ක්රියාකලාපයන් ප්රශ්න කරන බැවින්, ඔවුන් රටින් පිටුවහල් කර ලංකාව “බුද්ධිමය කාන්තාරයක්” බවට පත් කිරීමට රජය සැලසුම් සහගතව කටයුතු කරන බවට ද ඔහු මෙහිදී අනතුරු ඇඟවීය.
