ඩුබායි පාලක ෂෙයික් මොහොමඩ් බින් රෂීඩ් අල් මක්ටූම් මහතා විසින් හවුල් නිවාස (Shared Housing) නියාමනය කිරීම සඳහා 2026 අංක (4) දරන නව නීතිය ප්රකාශයට පත් කර තිබේ. මෙම නව නීතිය යටතේ නිසි අවසර පත්රයක් නොමැතිව කිසිදු පුද්ගලයෙකුට හෝ සමාගමකට දේපළක් හවුල් නිවාස ඒකකයක් ලෙස නම් කිරීමට හෝ පවත්වාගෙන යාමට අවසර නොලැබේ. මෙම නීතිය උල්ලංඝනය කරන්නන් සඳහා ඩිරාම් 500,000 (රුපියල් කෝටි 4කට අධික) දක්වා දඩ මුදල් පැනවීමට ප්රතිපාදන සලසා ඇත.
මෙම නීතිය ඩුබායිහි පෞද්ගලික සංවර්ධන කලාප සහ නිදහස් වෙළඳ කලාප ඇතුළු මුළු එමීර් රාජ්යයටම බලපැවැත්වෙන අතර, නිවාස හිමියන්, කුලී නිවැසියන් සහ දේපළ කළමනාකරණ සමාගම් මෙහි වගකීමට බැඳී සිටී. කෙසේ වෙතත්, සාමූහික කම්කරු නවාතැන් (Collective labour accommodation) සඳහා මෙම නීතිය අදාළ නොවේ. නිසි සෞඛ්ය සහ ආරක්ෂිත ප්රමිතීන් පවත්වා ගැනීම, නිවාස ඒකකවල අධික ලෙස ජනතාව පදිංචි වීම (Overcrowding) වැළැක්වීම සහ නිවැසියන්ගේ අයිතිවාසිකම් ආරක්ෂා කිරීම මෙහි ප්රධාන අරමුණයි.
ඩුබායි මහ නගර සභාව (Dubai Municipality) මෙම නීතිය ක්රියාත්මක කිරීමේ අධීක්ෂණ ආයතනය ලෙස කටයුතු කරනු ඇත. ඒ අනුව, එක් නිවැසියෙකු සඳහා තිබිය යුතු අවම ඉඩ ප්රමාණය, නිවසක පදිංචි විය හැකි උපරිම පුද්ගලයින් සංඛ්යාව සහ හවුල් නිවාස සඳහා අවසර දෙනු ලබන නිශ්චිත ප්රදේශ තීරණය කිරීමේ බලය මහ නගර සභාව සතු වේ. ජනගහන ඝනත්වය සහ යටිතල පහසුකම් සැලකිල්ලට ගනිමින් නාගරික සැලසුම්කරණයට අනුව මෙම ප්රදේශ නම් කිරීමට නියමිතය.
