පාස්කු ඉරුදින එල්ල වූ මරාගෙන මැරෙන ත්රස්ත ප්රහාරය පිළිබඳව පූර්ව බුද්ධි තොරතුරු ලැබී තිබියදීත්, එය වළක්වා ගැනීමට පියවර නොගැනීම සම්බන්ධයෙන් හිටපු ආරක්ෂක ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දර යන මහත්වරුන්ට එරෙහිව පවරා ඇති නඩුව අද (13) යළි කැඳවන ලදී. එහිදී විත්තියේ සාක්ෂි ලබන 26 වනදා ඉදිරිපත් කරන ලෙස කොළඹ ත්රිපුද්ගල මහාධිකරණ විනිසුරු මඩුල්ල නියම කළේය.
මෙම නඩුව අද කැඳවූ අවස්ථාවේදී විත්තිකාර හේමසිරි ප්රනාන්දු සහ පූජිත් ජයසුන්දර යන මහත්වරු අධිකරණය හමුවේ පෙනී සිටියහ. ප්රහාරය වළක්වා නොගැනීම තුළින් සාපරාධී ලෙස රාජකාරිය පැහැර හැරීම සහ මනුෂ්ය ඝාතන සිදුකිරීමට අනුබල දීම යන චෝදනා යටතේ නීතිපතිවරයා විසින් මෙම නඩුව පවරා තිබේ.
පාස්කු ප්රහාරය සම්බන්ධයෙන් වින්දිතයන්ට යුක්තිය ඉටුකිරීම රජයේ ප්රමුඛතාවක් බවට පත්ව ඇති පසුබිමක, මෙම නඩු විභාගය කෙරෙහි දෙස් විදෙස් අවධානය දැඩිව යොමුව පවතී. මෙයට සමගාමීව හිටපු ජනාධිපති මෛත්රීපාල සිරිසේන මහතා ද මූලික අයිතිවාසිකම් පෙත්සම් කිහිපයකට අදාළව වන්දි ගෙවීම් සම්බන්ධයෙන් අධිකරණ ක්රියාවලීන්ට මුහුණ දෙමින් සිටියි.
