ඉන්දියාවේ මනිපූර් ප්රාන්තයේ ප්රසිද්ධ දේශීය පුවත්පතක් වන ‘නහරොල්ගි තවුඩං’ (Naharolgi Thoudang) හි ප්රධාන කර්තෘ ඛෝයිරොම් ලෝයලක්පා (Khoirom Loyalakpa) මහතා ඉලක්ක කර ගනිමින් ඊයේ (18) රාත්රියේ බරපතල ප්රහාරයක් එල්ල වී තිබේ. රාත්රී 10:00ට පමණ ඔහු කාර්යාලයේ සිට නිවස බලා යමින් සිටියදී ඉම්ඵාල් ප්රදේශයේදී මෙම ප්රහාරය එල්ල වී ඇති බව ආරක්ෂක අංශ තහවුරු කරයි.
සැකකටයුතු මෝටර් රථයකින් පැමිණි සන්නද්ධ පිරිසක් කර්තෘවරයාගේ රථය අවහිර කර, එහි වම්පස වීදුරුවට වෙඩි ප්රහාර දෙකක් එල්ල කර ඇත. අනතුරුව ඔහුට දැඩි ලෙස පහර දී ඇති අතර, එහිදී ඔහුගේ මුහුණට සහ දත්වලට බරපතල තුවාල සිදුවී තිබේ. ප්රදේශවාසීන් එම ස්ථානයට රැස්වීමත් සමඟ ප්රහාරකයින් පළා ගොස් ඇති අතර, පොලිසිය විසින් එම ස්ථානයේ තිබී මිලිමීටර් .32 වර්ගයේ පතරොම් කොපු දෙකක් සොයාගෙන ඇත.
මනිපූර් හොකී සංගමයේ සභාපතිවරයා ද වන ලෝයලක්පා මහතාට මීට පෙර ද අවිගත් කණ්ඩායම්වලින් තර්ජන එල්ල වී තිබූ අතර, 2024 වසරේදී ඔහුගේ නිවසට ද වෙඩි ප්රහාර එල්ල විය. කෙසේ වෙතත්, රජය විසින් ඔහුට ලබා දී තිබූ ආරක්ෂාව 2024 වසරේදී ඉවත් කර තිබීම විශේෂත්වයකි. මෙම ප්රහාරයට හේතුව හෝ වගකිවයුත්තන් මෙතෙක් හඳුනාගෙන නොමැති අතර පෝරොම්පට් (Porompat) පොලිසිය වැඩිදුර විමර්ශන පවත්වයි.
