නගර සභා සහ ප්රාදේශීය සභා වැනි පළාත් පාලන ආයතන මගින් මෙතෙක් පියවනු ලැබූ වීථි ලාම්පු සඳහා වන විදුලි පිරිවැය, ඉදිරියේදී සෘජුවම සාමාන්ය විදුලි පාරිභෝගිකයාගේ බිලට එකතු කිරීමට රජය සූදානම් වන බවට ලංකා විදුලිබල මණ්ඩල නව සේවක සංගමය චෝදනා කරයි. එහි ප්රධාන ලේකම් ප්රියන්ත වික්රමසිංහ මහතා පෙන්වා දෙන්නේ, දැනටමත් පවතින විදුලි ගාස්තු හමුවේ පීඩාවට පත්ව සිටින ලක්ෂ 70ක් වන පාරිභෝගික ජනතාව මත මෙම අතිරේක බර පැටවීම අසාධාරණ බවයි.
පළාත් පාලන ආයතන විසින් මහජනතාවගෙන් විවිධ බදු අය කරගනු ලබන්නේ වීථි ලාම්පු වැනි පොදු සේවාවන් නඩත්තු කිරීමට වුවද, එම පිරිවැය නැවත වතාවක් විදුලි බිල හරහා අය කර ගැනීමට උත්සාහ කිරීම ජනතාව “ගසාකෑමක්” බව වික්රමසිංහ මහතා අවධාරණය කළේය. මෙය “එක පැත්තකින් දීලා අනිත් පැත්තෙන් ගන්නා” ක්රියාවක් ලෙස හඳුන්වා දුන් ඔහු, මෙම පියවර හරහා පාරිභෝගිකයා තවදුරටත් අමාරුවේ වැටෙන බව සඳහන් කළේය.
