මැදපෙරදිග කලාපයේ පවතින උත්සන්න වූ යුදමය වාතාවරණය සහ ගුවන් සීමාවන් වසා දැමීම හේතුවෙන්, එමිරේට්ස් (Emirates) ගුවන් සේවය අද (05) සිට මාර්තු 07 වනදා දක්වා සීමිත ගුවන් ගමන් කාලසටහනක් පමණක් ක්රියාත්මක කිරීමට තීරණය කර තිබේ. එක්සත් අරාබි එමීර් රාජ්යයේ වේලාවෙන් මාර්තු 07 මධ්යම රාත්රිය දක්වා මෙම සීමාවන් බලපැවැත්වෙනු ඇත. දැනට ක්රියාත්මක වන සීමිත ගුවන් වාර සඳහා ප්රමුඛතාවය ලබා දෙන්නේ කලින් ආසන වෙන් කරවා ගත් මගීන්ට පමණක් බව එම ගුවන් සේවය අවධාරණය කරයි.
ඩුබායි හරහා වෙනත් රටවල් බලා යන (Transit) මගීන් සඳහා අවස්ථාව හිමිවන්නේ ඔවුන්ගේ මීළඟ සම්බන්ධක ගුවන් යානය ක්රියාත්මක වන බවට ස්ථිර තහවුරු කිරීමක් ඇත්නම් පමණි. ගුවන් සමාගමෙන් සෘජු දැනුම් දීමක් හෝ ස්ථිර ගුවන් ගමන් බලපත්රයක් නොමැති මගීන්ට ගුවන් තොටුපළ වෙත නොපැමිණෙන ලෙස එමිරේට්ස් දැඩිව උපදෙස් දෙයි. මේ අතර, ඩුබායි නගරය පුරා පිහිටි සියලුම ‘සිටි චෙක්-ඉන්’ (City Check-in) මධ්යස්ථාන ද නැවත දැනුම් දෙන තුරු වසා දමා තිබේ.
ගුවන් ගමන් අවලංගු වීම නිසා පීඩාවට පත් මගීන්ට මාර්තු 27 වනදා දක්වා වලංගු වන පරිදි විකල්ප ගුවන් ගමන් වෙන් කරවා ගැනීමට හෝ මුදල් ආපසු ලබා ගැනීමට (Refund) අවස්ථාව සලසා දී ඇත. මාර්තු 12 වනදා හෝ ඊට පෙර ගමන් කිරීමට සැලසුම් කර තිබූ මගීන්ට විශේෂ අයදුම්පත්රයක් හරහා සිය මුදල් ලබා ගත හැකිය. සංචාරක නියෝජිතයන් හරහා ටිකට් පත් වෙන් කළ මගීන් ඔවුන්ගේ නියෝජිතයන් සම්බන්ධ කර ගත යුතු බවත්, සෘජුව වෙන් කළ මගීන්ට වෙබ් අඩවිය හරහා පෞද්ගලික තොරතුරු යාවත්කාලීන කර පණිවිඩ ලබා ගත හැකි බවත් එමිරේට්ස් පවසයි.
කලාපීය යුද්ධය හේතුවෙන් ඉන්ධන මිල ඉහළ යාම සහ හෝමුස් සමුද්ර සන්ධියේ නාවික ගමනාගමනයට එල්ල වී ඇති තර්ජන මෙන්ම, ගුවන් ගමන් සීමා වීම ද ලෝක වෙළඳාමට සහ සංචාරක කර්මාන්තයට දැඩි බලපෑමක් එල්ල කරමින් පවතී. ශ්රී ලංකාවේ සිට මැදපෙරදිග හරහා යුරෝපයට සහ අමෙරිකාවට යාමට සැලසුම් කර ඇති මගීන්ට ද මෙම තත්ත්වය සෘජුවම බලපානු ඇත. ගුවන් මගීන්ගේ සහ කාර්ය මණ්ඩලයේ ආරක්ෂාව තමන්ගේ ඉහළම ප්රමුඛතාවය බව එමිරේට්ස් ගුවන් සේවය වැඩිදුරටත් සඳහන් කරයි.
