ඉතියෝපියාවේ අගනුවර වන ඇඩිස් අබාබාහි බෝලේ (Bole) දිස්ත්රික්කයේ නිලධාරීන් රහිත පළමු ‘ස්මාර්ට්’ පොලිස් ස්ථානය පසුගිය පෙබරවාරි 09 වැනිදා එරට අගමැති අබී අහමඩ් (Abiy Ahmed) මහතා විසින් නිල වශයෙන් විවෘත කරන ලදී. සාම්ප්රදායික පොලිස් ස්ථානයක දක්නට ලැබෙන කලබලකාරී ස්වභාවය හෝ නිලධාරීන්ගේ දිගු පෝලිම් වෙනුවට, මෙහි ඇත්තේ නවීන තාක්ෂණයෙන් යුත් පරිගණක තිර සහිත කුටි පෙළකි. ‘ඩිජිටල් ඉතියෝපියාව 2030’ (Digital Ethiopia 2030) උපායමාර්ගික සැලසුම යටතේ ක්රියාත්මක වන මෙම ව්යාපෘතිය මඟින් මහජනතාවට වඩාත් කාර්යක්ෂම සහ විනිවිදභාවයෙන් යුත් සේවාවක් ලබා දීම රජයේ අපේක්ෂාව වී තිබේ.
මෙම නවතම ක්රමය යටතේ පුරවැසියන්ට පොලිස් නිලධාරියෙකු හමු නොවී ස්වයංක්රීය පර්යන්ත (terminals) හරහා අපරාධ වාර්තා කිරීම, රථවාහන අනතුරු පිළිබඳ තොරතුරු ලබා දීම සහ විවිධ පැමිණිලි ඉදිරිපත් කිරීමේ හැකියාව පවතී. එමෙන්ම තමන් ඉදිරිපත් කළ පැමිණිලිවල වර්තමාන තත්ත්වය (real-time tracking) සිය ජංගම දුරකථනය හරහාම පරීක්ෂා කිරීමට ද මෙහිදී අවස්ථාව සලසා දී ඇත. දැනට මෙම මධ්යස්ථානය තුළ ජනතාවට තාක්ෂණය භාවිත කරන ආකාරය ඉගැන්වීම සඳහා නිල ඇඳුම් සන්නද්ධ නිලධාරීන් කිහිප දෙනෙකු රඳවා සිටියද, ඉදිරියේදී මෙය සම්පූර්ණයෙන්ම ස්වයංක්රීයව ක්රියාත්මක කිරීමට සැලසුම් කර තිබේ.
අගමැති අබී අහමඩ් මහතා පවසන පරිදි, මෙම තාක්ෂණික විප්ලවය මඟින් අපරාධ මර්දනය ශක්තිමත් වන අතර පොලිස් සේවය කෙරෙහි පවතින මහජන විශ්වාසය තවදුරටත් වර්ධනය වනු ඇත. කෙසේ වෙතත්, ඉතියෝපියාවේ දුරස්ථ ප්රදේශවල පවතින දුර්වල අන්තර්ජාල පහසුකම් සහ විදුලි බලය බිඳවැටීම් වැනි ගැටලු හමුවේ මෙම ‘ස්මාර්ට්’ පොලිස් සංකල්පය රට පුරා ව්යාප්ත කිරීම අභියෝගාත්මක වනු ඇති බවට ද ආර්ථික විශ්ලේෂකයෝ මත පළ කරති. අප්රිකානු කලාපයේ මෙවැනි පූර්ණ ස්වයංක්රීය පොලිස් පද්ධතියක් හඳුන්වා දුන් පළමු රට ලෙස ද ඉතියෝපියාව මෙහිදී ඉතිහාසයට එක් වේ.
