මැදපෙරදිග කලාපයේ උද්ගතව ඇති දැඩි නොසන්සුන්කාරී වාතාවරණය හේතුවෙන් තාවකාලිකව අත්හිටුවා තිබූ අබුඩාබි ජාත්යන්තර ගුවන් තොටුපළේ කටයුතු සීමිත මට්ටමින් යළි ආරම්භ කර තිබේ. ගෝලීය ගුවන් ගමන් දත්ත විශ්ලේෂණය කරන FlightRadar24 වෙබ් අඩවිය තහවුරු කරන පරිදි අද පස්වරු 2:00න් පසුව මගී ගුවන් යානා අටක් අබුඩාබි නුවරින් සිය ගමන් වාර සාර්ථකව ආරම්භ කර ඇත. ආරක්ෂක හේතූන් මත පනවා තිබූ සීමා ලිහිල් වීමේ පළමු පියවර ලෙස මෙය සැලකෙන අතර ඉරානය සහ ඊශ්රායලය අතර පවතින ගැටුම්කාරී තත්ත්වය හමුවේ ගුවන් සීමාවන්ගේ ආරක්ෂාව පිළිබඳව දැඩි අවධානයක් යොමු කරමින් මෙම මෙහෙයුම් සිදු කෙරේ. මෙලෙස ගුවන් ගමන් යළි ආරම්භ වීම මැදපෙරදිග රැඳී සිටින විදේශිකයන්ට මෙන්ම සංචාරකයන්ට ද මහත් සහනයක් වන අතර ඉදිරි පැය කිහිපය තුළ තත්ත්වය නිරීක්ෂණය කරමින් මෙහෙයුම් ධාරිතාව ඉහළ නැංවීමට බලධාරීන් අපේක්ෂා කරයි.
