චීනයෙන් එල්ල වන දැඩි ආර්ථික තරගයට මුහුණ දීම සඳහා සහ යුරෝපීය රැකියා සුරක්ෂිත කිරීම අරමුණු කරගනිමින් යුරෝපා කොමිසම විසින් ‘Buy EU’ (යුරෝපීය නිෂ්පාදන මිලදී ගන්න) නමැති නව ආර්ථික සැලසුමක් යෝජනා කර තිබේ. ‘Industrial Accelerator Act’ ලෙස හැඳින්වෙන මෙම කෙටුම්පත මගින් යුරෝපයේ රාජ්ය අරමුදල් වැය කිරීමේදී යුරෝපීය නිෂ්පාදන සහ අඩු කාබන් විමෝචනයක් සහිත ද්රව්ය සඳහා ප්රමුඛතාවය ලබා දීම අනිවාර්ය කෙරේ. මෙය නිදහස් වෙළඳපොළ ප්රතිපත්තියක් අනුගමනය කළ යුරෝපයේ ආර්ථික මූලධර්මවල සිදුවූ ඓතිහාසික හැරවුම් ලක්ෂයකි.
මැදපෙරදිග යුදමය වාතාවරණය හමුවේ බලශක්ති මිල ඉහළ යාම සහ චීනය විසින් සූර්ය පැනල වැනි හරිත තාක්ෂණික ක්ෂේත්රවල බලය අත්පත් කර ගැනීම හමුවේ මෙම තීරණය ගත් බව යුරෝපා කොමිසමේ උප සභාපති ස්ටෙෆාන් සේජර්න් (Stéphane Séjourné) මහතා පැවසීය. ඔහු පෙන්වා දෙන්නේ යුරෝපය මේ මොහොතේ ක්රියාත්මක නොවන්නේ නම් අනාගතයේදී තාක්ෂණික නිෂ්පාදන සියයට සියයක්ම චීනය සතු වීමේ අවදානමක් පවතින බවයි. මෙම නව නීතියට අනුව, රජයන් විසින් මිලදී ගන්නා විදුලි මෝටර් රථවල උපාංගවලින් 70%ක්ම යුරෝපයේ නිෂ්පාදිත ඒවා විය යුතු වේ.
මෙම සැලසුම හරහා හරිත තාක්ෂණික ක්ෂේත්රයේ රැකියා 150,000ක් පමණ උත්පාදනය කිරීමට හෝ සුරක්ෂිත කිරීමට අපේක්ෂා කෙරේ. එසේම, යුරෝපයේ ආයෝජනය කරන විදේශීය සමාගම් සඳහා ද නව කොන්දේසි පනවා ඇත. විශේෂයෙන්ම යුරෝ මිලියන 100කට වඩා වැඩි ආයෝජනයක් සිදු කරන්නේ නම්, එහි රැකියා අවස්ථාවලින් 50%ක් යුරෝපීය වැසියන් සඳහා වෙන් කළ යුතු වේ. මෙහිදී බ්රිතාන්යය සහ ජපානය වැනි විවෘත වෙළඳපොළවල් සහිත රටවලට යුරෝපය සමඟ සහයෝගයෙන් කටයුතු කිරීමට අවස්ථාව ලබා දී ඇති අතර, අමෙරිකාව සහ ඉන්දියාව වැනි රටවල් සම්බන්ධයෙන් දැඩි රෙගුලාසි පැනවීමට ඉඩ ඇත.
දැනට යුරෝපයේ භාවිත කරන සූර්ය පැනලවලින් 94%ක්ම චීනයෙන් ආනයනය කරන අතර, මෙම තත්ත්වය වෙනස් කර 2035 වන විට යුරෝපයේ දළ දේශීය නිෂ්පාදිතයෙන් 20%ක් කාර්මික අංශයෙන් ලබා ගැනීමට රජය ඉලක්ක කරයි. කෙසේ වෙතත්, බ්රිතාන්යය ඇතුළු ඇතැම් වෙළඳ හවුල්කරුවන් පෙන්වා දෙන්නේ මෙම නව බාධක හරහා ජාත්යන්තර සැපයුම් දාමයන්ට හානි සිදුවිය හැකි බවයි. ලෝක බලවතුන් සියලු දෙනාම දැන් සිය රටවල කර්මාන්ත ආරක්ෂා කිරීමට උත්සාහ කරන බැවින්, යුරෝපය ද සිය “හිස් බව” (Naivety) අත්හැර මෙම පියවර ගත් බව හරිත පක්ෂයේ නායකයෝ පවසති.
