යුරෝපය තුළ යුදෙව් විරෝධී (Antisemitism) ප්රහාර සහ තර්ජන දරුණු ලෙස ඉහළ යමින් පවතින බවත්, එය සමස්ත යුරෝපීය සමාජයේම සදාචාරාත්මක බිඳවැටීමක සලකුණක් බවත් යුදෙව් විරෝධයට එරෙහි සටන් ව්යාපාරයේ (Combat Antisemitism Movement) ප්රධාන විධායක නිලධාරී සචා රොයිට්මන් ඩ්රැට්වා (Sacha Roytman Dratwa) මහතා පවසයි. දෙවන ලෝක යුද්ධ සමයේ සිදුවූ ‘හොලෝකෝස්ට්’ (Holocaust) මහා සංහාරයෙන් වසර 80කට පසුවත්, යුරෝපයේ වෙසෙන යුදෙව් දරුවන්ට පාසල් යාම සඳහා සන්නද්ධ හමුදා ආරක්ෂාව ලබා ගැනීමට සිදුවීම ශිෂ්ට සම්පන්න සමාජයක අසාර්ථකත්වය පෙන්වන කැඩපතක් බව ඔහු පෙන්වා දෙයි. යුදෙව් ජීවිත වර්තමානයේ යුරෝපය තුළ විවිධ බාධක සහ ආරක්ෂක වැටවල් මැද ගෙවීමට සිදුව ඇති බවත්, මෙය යුදෙව්වන්ට පමණක් සීමා වූ ප්රශ්නයක් නොව මුළු මහත් ප්රජාතන්ත්රවාදයටම එල්ල වූ තර්ජනයක් බවත් ඔහු වැඩිදුරටත් අවධාරණය කරයි.
පසුගිය දින කිහිපය තුළ පමණක් යුරෝපයේ ප්රධාන නගර කිහිපයකින්ම යුදෙව් විරෝධී ප්රහාර වාර්තා වී තිබේ. ලන්ඩන් නුවර ගෝල්ඩර්ස් ග්රීන් (Golders Green) ප්රදේශයේදී, සියලුම ජාතීන්ට ස්වේච්ඡා වෛද්ය ආධාර සපයන ‘හට්සෝලා’ (Hatzola) නමැති යුදෙව් ගිලන් රථ සේවයට අයත් රථ හතරක් හිතාමතාම ගිනි තබා විනාශ කර ඇති අතර, බෙල්ජියමේ ලීජ් (Liège) නුවර සිනගෝගයක් (යුදෙව් පල්ලියක්) ඉලක්ක කර ගනිමින් බෝම්බ පිපිරීමක් ද සිදු කර ඇත. මීට අමතරව ඇම්ස්ටර්ඩෑම් නුවර යුදෙව් පාසලකට එල්ල වූ පුපුරණ ද්රව්ය ප්රහාරය ද යුරෝපය පුරා වෙසෙන යුදෙව් ප්රජාව දැඩි භීතියකට පත් කිරීමට සමත්ව තිබේ. මෙම ප්රහාර මාලාවත් සමඟ බොහෝ රටවල් යුදෙව් ආගමික ස්ථාන සහ පාසල් අවට ආරක්ෂාව තර කිරීමට පියවර ගෙන ඇත.
ඩ්රැට්වා මහතා පවසන පරිදි, බොහෝ යුදෙව්වන් අද වන විට තමන්ගේ අනන්යතාව හෙළි වන සලකුණු පැළඳීමට පවා බිය වන තත්ත්වයක් නිර්මාණය වී තිබේ. තමන්ගේම රටවල් තුළ අන්යයන්ගෙන් වෙන්වී, ආරක්ෂක වළලු මැද ජීවත් වීමට සිදුවීම යුරෝපය සිය පශ්චාත්-හොලෝකෝස්ට් පොරොන්දු කඩ කිරීමක් ලෙස ඔහු හඳුන්වයි. ඊශ්රායලය යුදමය වාතාවරණයක පැවතියද, එහි යුදෙව් ජීවිත විවෘතව සහ නිදහසේ ගත කළ හැකි බවත්, ඊට සාපේක්ෂව යුරෝපය තුළ යුදෙව්වන්ට පවතින අනාරක්ෂිත බව කණගාටුදායක බවත් ඔහු සිය ලිපිය මගින් පෙන්වා දෙයි. මෙම තත්ත්වය පාලනය කිරීමට වහාම දැඩි ක්රියාමාර්ග නොගතහොත් යුරෝපයේ නිදහස සහ සාමය තවදුරටත් අනතුරේ වැටෙනු ඇති බවට ඔහු අනතුරු අඟවයි.
