මිලදී ගැනීමේ ශක්තිය (Purchasing Power Standards – PPS) මත පදනම් වූ ඒක පුද්ගල දළ දේශීය නිෂ්පාදිතය (GDP per capita) අනුව 2025 වසරේ යුරෝපා රටවල ආර්ථික මට්ටම්වල පවතින දැවැන්ත පරතරය පිළිබඳ වාර්තාවක් යුරෝස්ටැට් (Eurostat) ආයතනය මගින් ප්රකාශයට පත් කර ඇත. මෙම දත්තයන්ට අනුව, යුරෝපා සංගමයේ සාමාන්ය අගය 100ක් ලෙස සැලකූ විට, යුරෝපයේ ඉහළම ආර්ථික ශක්තියක් සහිත රට ලෙස ලක්සම්බර්ග් (Luxembourg) වාර්තා වන අතර එහි අගය 239කි. එය යුරෝපා සංගමයේ සාමාන්ය අගයට වඩා 139%ක ඉහළ අගයකි.
ලක්සම්බර්ග් රාජ්යයට ඉතා සමීපව දෙවන ස්ථානය අයර්ලන්තය (Ireland) දිනාගෙන ඇති අතර, එහි මිලදී ගැනීමේ ශක්තියේ අගය 237ක් හෙවත් සාමාන්ය අගයට වඩා 137%ක වර්ධනයකි. මෙම රටවල් දෙක අනෙකුත් යුරෝපා රටවලට වඩා ඉතා ඉහළ ආර්ථික ස්ථාවරත්වයක් පෙන්නුම් කරන බව මෙම දත්ත මගින් තහවුරු වේ. සාමාන්යයෙන් යුරෝපා සංගමයේ සෑම පුද්ගලයන් තිදෙනෙකුගෙන් එක් අයෙකුම ජීවත් වන්නේ යුරෝපා සාමාන්ය අගයට වඩා වැඩි ආර්ථික මට්ටමක් සහිත රටවල බව ද එම වාර්තාවේ සඳහන් වේ.
කෙසේ වෙතත්, බල්ගේරියාව (Bulgaria) සහ ග්රීසිය (Greece) යුරෝපයේ අඩුම ඒක පුද්ගල ආදායම් මට්ටම් සහිත රටවල් ලෙස හඳුනාගෙන ඇත. එම රටවල මිලදී ගැනීමේ ශක්තියේ අගය 68ක් ලෙස සටහන් වන අතර, එය යුරෝපා සංගමයේ සාමාන්ය අගයට වඩා 32%ක පහළ මට්ටමකි. මේ අනුව, ලක්සම්බර්ග් වැසියෙකුගේ මිලදී ගැනීමේ ශක්තිය බල්ගේරියානු හෝ ග්රීක වැසියෙකුට වඩා දළ වශයෙන් 3.5 ගුණයකින් වැඩි බව මෙම ආර්ථික විශ්ලේෂණය මගින් පෙන්වා දෙයි.
