ශ්රී ලංකා සුරාබදු දෙපාර්තමේන්තුවේ ආදායම පසුගිය වසර තුනක කාලය තුළ සියයට 60කට වඩා වැඩි ප්රතිශතයකින් වර්ධනය වී ඇති බව එම දෙපාර්තමේන්තුව පවසනවා. මෙලෙස බදු ආදායම සීඝ්රයෙන් ඉහළ යාමට ප්රධානතම හේතුව වී ඇත්තේ මත්පැන් බෝතල්වල ආරක්ෂිත ස්ටිකර් ඇළවීමේ ව්යාපෘතිය සාර්ථකව ක්රියාත්මක වීමයි
මෙරට නිෂ්පාදනය කරන සියලුම මත්පැන් බෝතල්වලින් නිසි පරිදි බදු අයකිරීමේ අරමුණින් 2022 වසරේ ජනවාරි මාසයේදී මෙම ව්යාපෘතිය ආරම්භ කෙරුණා.
එසේම රජය විසින් 2025 වසර සඳහා සුරාබදු දෙපාර්තමේන්තුවට රුපියල් බිලියන 242ක ආදායම් ඉලක්කයක් ලබා දී තිබූ අතර, 2025 වසරේ මුල් මාස 9 (ජනවාරි – සැප්තැම්බර්) සඳහා නියමිතව තිබූ රුපියල් බිලියන 177ක ඉලක්කයද අභිබවා යමින් රුපියල් බිලියන 190ක ආදායමක් උපයා ගැනීමට ඔවුන් සමත්ව තිබෙනවා. මෙය නියමිත ඉලක්කයට වඩා රුපියල් බිලියන 13.4ක වැඩිවීමක් වන අතර සියයට 107ක ඉලක්ක සපුරා ගැනීමක් බව එවකට සිටි සුරාබදු කොමසාරිස් ජනරාල් එම්.බී.එන්.ඒ. පේමරත්න මහතා සඳහන් කර තිබුණා
මුල් අවධියේදී ඇතැම් මත්පැන් නිෂ්පාදන සමාගම් මෙම ස්ටිකරය ඇළවීමට කටයුතු නොකිරීම නිසා රජයට හිමිවිය යුතු බදු ආදායමෙන් සියයට 50ක් පමණ අහිමි වන බවට චෝදනා එල්ල වුවද, සුරාබදු දෙපාර්තමේන්තුව සිදුකළ වැටලීම් සහ විමර්ශන හේතුවෙන් ව්යාපෘතිය සාර්ථක කර ගැනීමට හැකිව තිබෙනවා. මෙමඟින් බදු ආදායම ඉහළ යාමට අමතරව ප්රමිතියෙන් තොර ව්යාජ මත්පැන් පහසුවෙන් හඳුනා ගැනීමටද මහජනතාවට අවස්ථාව සැලසී ඇත
මෙම ස්ටිකර් මුද්රණය කිරීමේ කොන්ත්රාත්තුව ඉන්දියාවේ මැඩ්රාස් සෙකියුරිටි ප්රින්ටර්ස් (MSP) ආයතනය විසින් භාරගෙන ඇති අතර, එක් ස්ටිකරයක් සඳහා වැයවන්නේ රුපියල් 1.21ක් වැනි මුදලක් බව මුදල් අමාත්යාංශය පවසනවා. මේ වන විට දිවයින පුරා පවතින මත්පැන් නිෂ්පාදන ආයතන 70ක් සහ ආනයනික ආයතන 18ක් සම්බන්ධීකරණය කරමින් මෙම ආරක්ෂිත ස්ටිකර් සහ ඩිජිටල් මුද්රණ ක්රමවේදය ක්රියාත්මක වේ
