නොරොච්චෝලේ ලක්විජය බලාගාරය සඳහා ආනයනය කර ඇති බාල ගල්අඟුරු භාවිතය හේතුවෙන් එහි විදුලි උත්පාදන ටර්බයිනවලට (Turbines) බරපතළ හානි සිදුවිය හැකි බව බලශක්ති විශ්ලේෂක ආචාර්ය විදුර රළපනාව මහතා අනතුරු අඟවයි. දැනට පවතින උසස් ප්රමිතියේ ගල්අඟුරු තොග අවසන් වෙමින් පවතින බැවින්, එළඹෙන මාර්තු මස 01 වනදා සිට බලාගාරයේ සම්පූර්ණ ක්රියාකාරීත්වය සඳහා මෙම බාල ගල්අඟුරු මතම යැපීමට සිදුවනු ඇතැයි ඔහු පෙන්වා දෙයි.
දැනට දකුණු අප්රිකාවෙන් ගෙන්වා ඇති මෙම ගල්අඟුරු තොගය භාවිත කරන්නේ දිනකට පැය 10 ත් 16 ත් අතර සීමිත කාලයක් පමණි. එහෙත් මාර්තු මස සිට දිනකට පැය 24 පුරාම මෙම බාල ඉන්ධන දහනය කිරීමට සිදුවුවහොත්, බලාගාරයේ යන්ත්ර සූත්රවලට සිදුකළ නොහැකි හානි සිදුවීමේ දැඩි අවදානමක් පවතී. විශේෂයෙන්ම වියළි කාලගුණය පවතින මෙවැනි වකවානුවක බලාගාරයේ ජනන යන්ත්ර දෙකක් හෝ තුනක් අක්රිය වුවහොත් එය ජාතික විදුලි පද්ධතියේ බිඳවැටීමකට සෘජුවම බලපානු ඇත.
ප්රමිතියෙන් තොර ගල්අඟුරු භාවිතය නිසා දැනටමත් දිනකට මෙගාවොට් 95ක පමණ විදුලි ධාරිතාවක් ජාතික පද්ධතියට අහිමි වෙමින් පවතින බවත්, එම අඩුව පිරවීම සඳහා රජයට අධික පිරිවැයක් දරමින් ඛනිජ තෙල් මගින් විදුලිය උත්පාදනය කිරීමට සිදුව ඇති බවත් ආචාර්ය රළපනාව මහතා වැඩිදුරටත් සඳහන් කළේය. බලධාරීන් වහාම ඉංජිනේරුවන් සමඟ සාකච්ඡා කර මේ සඳහා පිළියම් නොගතහොත් ඉදිරියේදී විදුලි බිල විශාල වශයෙන් ඉහළ යාමේ තර්ජනයක් ද පවතී.
