බාර්සිලෝනා 2032 දක්වා ෆෝමියුලා වන් (F1) සත්කාරකත්වය තහවුරු කරයි
බාර්සිලෝනාහි සර්කිට් ඩි කැටලූන්යා ධාවන පථය 2032 වසර දක්වා ෆෝමියුලා වන් තරග සඳහා සත්කාරකත්වය සැපයීමේ නව ගිවිසුමකට එළඹ තිබේ. මෙම නව එකඟතාවය අනුව, බාර්සිලෝනා ධාවන පථය බෙල්ජියමේ ස්පා-ෆ්රැන්කෝර්චැම්ප්ස් (Spa-Francorchamps) ධාවන පථය සමඟ වසරින් වසර මාරුවෙන් මාරුවට (Rotational basis) තරග පවත්වනු ඇත. ඒ අනුව 2028, 2030 සහ 2032 වසරවලදී බාර්සිලෝනාහි තරග පැවැත්වෙන අතර, 2027, 2029 සහ 2031 වසරවලදී බෙල්ජියම සත්කාරකත්වය දරනු ඇත. ස්පාඤ්ඤ ග්රෑන්ඩ් ප්රී තරගාවලියේ නිල සත්කාරකත්වය මැඩ්රිඩ් නගරය වෙත හිමි වුවද, බාර්සිලෝනා ධාවන පථය 2026 ජුනි මාසයේදී ‘බාර්සිලෝනා-කැටලූන්යා ග්රෑන්ඩ් ප්රී’ නමින් තරගය පවත්වමින් F1 දින දර්ශනයේ සිය ස්ථානය තවදුරටත් රඳවා ගනු ඇත.
ෆෝමියුලා 1 හි ප්රධාන විධායක නිලධාරී ස්ටෙෆානෝ ඩොමිනිකාලි මහතා ප්රකාශ කළේ බාර්සිලෝනා යනු රසිකයන්ගේ නොමඳ ආකර්ෂණය දිනාගත් අසිරිමත් නගරයක් බවයි. ධාවන පථයේ අනාගතය පිළිබඳව මීට පෙර යම් සැක සහිත තත්ත්වයක් පැවතියද, මෑත කාලීනව සිදු කරන ලද දැවැන්ත ආයෝජනයන් මෙම ධුර කාලය දීර්ඝ කිරීමට ප්රධාන හේතුවක් වී තිබේ. නවීන ආගන්තුක සත්කාර අවකාශයන් නිර්මාණය කිරීම, වහලවල් සහිත නැරඹුම් මැදිරි ඉදිකිරීම සහ සූර්ය පැනල පද්ධති ස්ථාපනය කිරීම හරහා පරිසර හිතකාමී ධාවන පථයක් ලෙස මෙය සංවර්ධනය කර ඇත.
1992 බාර්සිලෝනා ඔලිම්පික් උළෙලට සමගාමීව 1991 වසරේදී ඉදිකරන ලද මෙම ධාවන පථය, දශක තුනකට වැඩි කාලයක් ලෝකයේ ප්රමුඛතම මෝටර් රථ ධාවන තරග සඳහා වේදිකාව සකසා දී තිබේ. නවීකරණය කරන ලද 9, 10 සහ 11 වන හැරවුම් (Turns) හරහා ක්රීඩකයන්ට මෙන්ම ප්රේක්ෂකයන්ටද වඩාත් උද්යෝගිමත් අත්දැකීමක් ලබා දීමට පාලනාධිකාරිය පියවර ගෙන ඇත. මෙම තීරණයත් සමඟ ස්පාඤ්ඤය තුළ එකම වසරකදී ග්රෑන්ඩ් ප්රී තරගාවලි දෙකක් නැරඹීමේ අවස්ථාවද රසිකයන්ට උදාවනු ඇත.
