වර්තමාන ආණ්ඩුව වංචාවෙන් සහ දූෂණයෙන් තොරව නිවැරදි ගමනක් යන බැවින්, පවතින අඩුපාඩු මධ්යයේ වුවද තම සහයෝගය රජයට ලබාදෙන බව ෆීල්ඩ් මාර්ෂල් සරත් ෆොන්සේකා මහතා ප්රකාශ කළේය. ඊයේ (01) මල්වතු මහා විහාරයට ගොස් මහානායක හිමියන් බැහැදැකීමෙන් අනතුරුව මාධ්ය වෙත අදහස් දක්වමින් ඔහු මේ බව සඳහන් කළේය.
ආණ්ඩුවේ වගකිව යුතු තනතුරු ලබාගැනීමේ කිසිදු බලාපොරොත්තුවක් තමන්ට නොමැති බවත්, ආණ්ඩුව බලයට පත් කිරීමට කැපවූ පිරිසට එම වගකීම් හිමිවිය යුතු බවත් ඔහු පැවසීය. වර්තමානයේ පවතින ඩොලර් 3500ක ඒක පුද්ගල ආදායම ඩොලර් 9000-10,000 දක්වා ඉහළ නැංවීමේ දැක්මක් සහිතව තමන් කටයුතු කරන බව ඔහු මෙහිදී අවධාරණය කළේය.
වත්මන් ආණ්ඩුවෙන් බලය ගිලිහී ‘සුන්බුන් විපක්ෂයක්’ වැනි පිරිසකට බලය ලැබුණහොත් රටට දෙවියන්ගේම පිහිට පැතීමට සිදුවන බවට ඔහු අනතුරු ඇඟවීය. තමන් නව සන්ධානයක් ගොඩනගන්නේ වත්මන් රජයට එරෙහිව නොව, අද විපක්ෂයේ සිටින දූෂිත පිරිසට එරෙහිව බව ඔහු පැහැදිලි කළේය.
අතීත යුද සමයේ බෝම්බ මිල ඉහළ දමා මහා පරිමාණ දූෂණවල නිරත වූ පිරිස අද විපක්ෂයේ සිටින බවත්, එවැනි ‘තක්කඩි’ දේශපාලනයෙන් තුරන් කිරීම වෙනුවෙන් තමන් කැපවන බවත් ෆීල්ඩ් මාර්ෂල්වරයා වැඩිදුරටත් ප්රකාශ කළේය.
