ආරක්ෂක අමාත්යාංශයේ ආපදා කළමනාකරණ අතිරේක ලේකම් කේ. ධර්මතිලක මහතා ඊයේ (12) රජයේ ප්රවෘත්ති දෙපාර්තමේන්තුවේ පැවති මාධ්ය හමුවකදී ප්රකාශ කළේ, දිට්වා සුළි කුණාටුවෙන් පීඩාවට පත්වූවන් සඳහා රජය ක්රියාත්මක කරන වන්දි ගෙවීමේ වැඩපිළිවෙළේ වැඩි කොටසක් මේ වන විට සම්පූර්ණ කර ඇති බවයි.
පසුගිය වසරේ නොවැම්බර් මස අගදී ඇති වූ මෙම ආපදාවෙන් දිස්ත්රික්ක 22ක පුද්ගලයින් ලක්ෂ 7කට අධික පිරිසක් පීඩාවට පත් විය. නිවාස පිරිසිදු කිරීම සහ සනීපාරක්ෂක කටයුතු වෙනුවෙන් රජය ලබා දුන් රුපියල් 25,000 දීමනාව සුදුසුකම් ලත් පිරිසෙන් 98.2%කට දැනටමත් ලබා දී ඇත. ගෘහ භාණ්ඩ සහ උපකරණ අලුත්වැඩියා කර ගැනීම සඳහා වන රුපියල් 50,000 දීමනාව ගෙවීම් කටයුතු 81.5%ක් දක්වා සම්පූර්ණ කර ඇති බව ද ලේකම්වරයා සඳහන් කළේය. මේ වන විට සුරක්ෂිතතා මධ්යස්ථාන 50ක පවුල් 1,373කට අයත් සාමාජිකයින් 4,175ක් රැඳී සිටිති.
පූර්ණ නිවාස හානි වූ පවුල් 201ක් සඳහා දැනට වන්දි ගෙවා ඇති අතර, ඉඩම් සම්බන්ධ පවතින ගැටලු හේතුවෙන් තවත් පිරිසකට එම ගෙවීම් සිදු කිරීම ප්රමාද වී තිබේ. කුලී නිවාස සඳහා පවුල් 8,998ක් සුදුසුකම් ලැබුවත්, පවතින නිවාස හිඟය හේතුවෙන් පවුල් 1,018ක් පමණක් දැනට පදිංචි කරවා ඇත. මීට අමතරව, ජීවනෝපාය අහිමි වූ පවුල් 1,254ක් සඳහා ද සහන ලබා දීමට කටයුතු සම්පාදනය කර ඇති බව අතිරේක ලේකම්වරයා වැඩිදුරටත් පැවසීය.
ආපදා සහන හෝ වන්දි ලබා ගැනීමේදී යම් ගැටලුවක් පවතින්නේ නම්, ඒ පිළිබඳව දැනුම් දීම සඳහා අත්යවශ්ය සේවා කොමසාරිස් කාර්යාලය විසින් 1904 ක්ෂණික දුරකථන අංකය හඳුන්වා දී ඇත. විපතට පත් ජනතාවට එමගින් සිය පැමිණිලි ඉදිරිපත් කළ හැකි අතර, අත්යවශ්ය සේවා කොමසාරිස් ජනරාල් ප්රභාත් චන්ද්රකීර්ති මහතා සඳහන් කළේ සියලුම දිස්ත්රික් ලේකම්වරුන් සමඟ එක්ව එම ගැටලු කඩිනමින් විසඳීමට මැදිහත් වන බවයි.
